Bru tana a bika ruahmanna siam tha ti lo

Central YMA Executive Committee (CEC) thukhawm chuan Tuirial bial-a Assembly bye-election neih turah Tripura State a awm mek Bru ten vote an thlak theihna tura Election Commission in a bika ruahmanna a siam sak chu tha an tihloh thu an sawi.

Inrinni khan Central YMA chuan CEC thutkhawm neiin he thu hi an sawi a, Tripura-a Bru tlan thla te chu anmahni duh thu ngeia tlan thla an nih thu leh Mizoram Electoral Roll a chuang mek te chu an Roll chuanna hmun Polling Booth-ah ngei vote an thlak theih nana hma la turin Election buaipuitute an ngen tih an sawi a. Bru vote thlak turte chu Sawrkar senso a hruaikhawm an nih loh nan Sawrkarin hmala turin an ngen tih an sawi bawk.

Hemi chungchang ah hian Mizoram a Political Party hrang hrang te pawhin Mizoram Chief Electoral Officer hnenah ngenna thlenin Bru te chu Tripura-a awm nghet an nih tawh avangin leh Ministry of Home Affairs kaihhruaina a inremna Mizoram sawrkar leh Tripura sawrkar ten an ziah ah Tripura-a awm nghet tura thuthlung an ziah tawh avangin Mizoram a vote an thlak loh nan ECI chu hmala turin an ngen tih an sawi a, hemi bakah hian Tripura a Bru awm te chu Mizoram Electoral Roll atanga paih turin an ngen bawk a ni. Mizoram Chief Electoral Officer hnenah hian rorellai MNF bakah Congress, ZPM, PC Party leh ZNP ten ngenna an thlen a, BJP erawh in an thlen ve lo nia hriat a nih thu kan thudawnna chuan a sawi bawk.

Tuirial Bial by-election neih turah hian Tripura-a awm mek Bru, Mizoram a vote nei mi 663 an awm mek ni a chhinchhiah a ni.