Latest News

Civil Hospital Aizawl-ah ICU Ward thar hawng

Civil Hospital, Aizawl-a khum 10 awm theihna tur Medical Intensive Care Unit (ICU) Ward thar chu Inrinni khan Health Minister Dr. R. Lalthangliana chuan a hawng a, Medical ICU Ward dang khum 10 awmna pawh reilote ah peihfel a nih tur thu a sawi.

Civil Hospital Conference Hall-a ICU thar hawn puala inkhawm buatsaihah Health Minister Dr. R. Lalthangliana chuan Mellung thar phunna ni a nih thu sawiin, “Civil Hospital, Aizawl chu damlo na zualte enkawlna tur ICU khum 10 zet kan neih belh ta hi a lawmawm takzet a, damlote tan malsawmna a nih bakah sum tam tak damlo ten an sen thin pawh nasa takin a chhawk zangkhai thei dawn a ni,” a ti a. Civil Hospital, Aizawl-ah hian hun rei tak ICU khum 5 awmin an kal reng tih sawiin, “Tunah hian 15-ah tihpun a ni ta a, reilote ah Medical ICU khum 10 dang kan peihfel dawn bakah Pediatric ICU khum 4 leh Obstetric ICU khum 4 awmna peihfel a ni dawn bawk a, peihfel a nih hunah chuan ICU khum 33 a awm tawh dawn a ni,” a ti bawk.

Dedicated COVID Hospital - Zoram Medical College-a ICU khum 34 awm mek bakah khum 20 dang dah belh tura hmalakna pawh kalpui a nih thu Health Minister chuan a sawi a, ICU ward thara thawk tur Nurse 50 sawrkarin a lak mek thu leh ICU Ward thara thawk tur Staff dang lak tawh sa te pawh training pek vek tawh nia sawiin, Ventilator rawn vuah tur Company Technician te pawh  hna an thawk nghal char char thu leh khum engemawzat hi chu tunkar ah kan hman tan theih a beisei thu a sawi bawk.

Civil Hospital, Aizawl-ah hian kum 2007 khan Medical ICU khum 3 dahin bul tan a ni a, kum 2012-ah khum 2 dah belhin khum 5-ah tihpun a ni a, tunah hian khum 10 dah belhin khum 15 a awm ta a, ward dang khum 10 awmna peihfel a nih hunah chuan Medical ICU khum 25 a awm tawh dawn a ni.

Comments

Chhiar Hlawhte