Serchhip khawpui chhungah hri kai enkawlna tur tam zawk siam turin hmalak mek a ni

Tunhnaiah Serchhip khawpui chhungah COVID-19 hri kai hmuhchhuah an pun deuh avanga hri kai enkawlna hmun indaihlohna thleng palh theih venna atan hri kai enkawlna tam zawk siam turin hmalakna kalpui mek a ni.

Serchhip CMO Office-a District Surveillance Officer Dr. Lalngaihawmi Chhangte hnen atanga thu kan dawn danin Serchhip-a hri kai hmuhchhuah an pun zel avang hian hri kai te enkawlna tur hi ngaihtuah belh zel a ni a, tunhnaia hri kai hmuhchhuah tamna Serchhip Chhim Veng VLTF te chuan an huamchhungah Community Covid Care Centre (4C) hi siam theih an inbeisei thu leh amaherawh chu nimin lamah a hmun tur hi tifel lovin Vawiin lam hian tihfel theih an inbeisei tih a sawi a. Vengchung VLTF te pawhin TKS Camping Centre chu 4C atan hian ruahmanin nimin khan hnatlang in 4C buatsaih hna hi thawkin hman nghal mai theih beisei a ni a. IOC Veng pawhin an huamchhungah 4C hmun tur hi zawngin hei hi an hmu thei a nih chuan IOC Veng-ah hian 4C siam theih beisei a nih thu a sawi a. Heng VLTF te hmalakna hi a hlawhtling thei a nih chuan harsatna thleng lo tura beisei a nih thu a sawi bawk.

Hei bakah hian District Surveillance Officer chuan nikum lama hri kai te enkawlna atana lo hman tawh Highway Retaurant chu CCC atan nimin khan enfiah leh a nih thu sawiin, COVID-19 Third Wave-ah naupangte enkawlna atan pawh hman theih tura ngaih a nih thu a sawi a, hei hi thuneitu sang-ah thlenin a tul anga hmalak a nih tur thu leh mi 20 lai pawh enkawl theih tura beisei a nih thu a sawi a. Mi 100 enkawl theihna tura ruahman Nursing School CCC chu tunah hian a khat deuhthaw tih a sawi bawk.

Nikum lama Serchhip District-a COVID-19 hri kai hmuhchhuah an nih atang khan Serchhip District-ah hian hri kai enkawlna tur hi ruahman nghal niin hri kai zinga natna lanchhuahna neilo te enkawlna turin CCC leh hri kai lanchhuahna nei te enkawlna turin DCHC te ruahman a ni a. Hei bakah hian BSF Sipai zingah hri kai hmuhchhuah te enkawlna turin Nursing School chu CCC atan ruahman a ni bawk a. Amaherawh chu hri leng in ziaawm lam a pan hnuah Serchhip khawpui chhungah Nursing School chiah hi CCC atan hman zui a ni. Hri leng thawh hnihna a lo thlen hnuah Nursing School CCC chu hman zui niin District chhunga khaw thenkhat te chuan Community Covid Care Centre (4C) hi siamin hri kai te enkawlna kawngah harsatna a awm zui lutuk lova. August thla atangin Serchhip khawpui chhung ah hri kai hmuhchhuah an pun leh tak avang leh tun thlenga hri kai hmuhchhuah hi an la pun zel avangin tunah hian harsatna thleng mai thei dinhmun ah a ding mek a ni. Tun dinhmunah Serchhip khawpui chhungah hian Field Veng leh P&E Veng VLTF te chuan 4C hi siam tawhin hri kai hmuhchhuah an tam avang hian Veng bil pawhin an hmang hlei theilo nia thudawn a ni bawk.