Chanchin thar thenkhat :

Kawngpui siamna atan Plastic Waste sawiho

Nimin khan Aizawl Mayor Lalrinenga Sailo hovin AMC Conference Hall-ah kawngpui siamna atana Plastic Waste hman tangkai theih dan tur sawiho a ni a, kan chenna environment tichhe nasa bertu pakhat, Plastic Waste lakkhawm leh kawngpui siamna atana hman tangkai dan tur sawihona-ah hian AMC Official pawimawhte bakah Mizoram Road Fund Board Secretariat Official-te leh Mizoram PWD Official-te an tel a. Aizawl khawpuia Plastic Waste hi mumal zawka tihral anih a, Environment venhim a nih theihna turin heng Plastic Waste hi kawngpui siamna atana hman tangkai theih dan kawng dapa theitawpa hmalak ho zel an tum a ni a. AMC chuan Aizawl khawpuia Plastic Waste hi a hrana lakkhawm a, hmun ruat bika dahkhawma, hman tangkai dan tur ruamhmanna a kalpui mek a ni.

Saitual-ah Pisa thar hawng

Land Resources, Soil & Water Conservation Department changtu Minister R. Lalzirliana chuan nimin khan Saitual-ah LRS&WC Range Office hawngin District Urban Development Officer (DUDO) Office thar hawngin a building sakna tur lungphum a phum nghal bawk a. He hunah hian R. Lalzirliana chuan Politics-a a luh hlim leh, helai bial-a a luh hlim atangin an tuina ber chu District thar neih a ni ber tih sawiin, “Politics-a a goal ka thlenpuina ah ka ngai che u a, ka tumah ka hlawhtlingah ka ngai bawk,” a ti.

Delhi-ah Tourism Minister

Guwahati-a Tourism Ministers Conference a a tel hnuah Mizoram Tourism Minister Robert Romawia Royte chuan Central sawrkar mi pawimawh te dawr turin nimin khan New Delhi a pan nghal a, Union Minister for Ports, Shipping and Waterways Sarbananda Sonowal chu hmuin Mizoram mamawh thil hrang hrang a sawipui a. Union Minister hian tawngkaa rawtna a thlen te chu ziaka pe tura lo hrilhin, a tihpuitlin theih dan kawng a zawnpui tur thu a lo hrilh a ni.

I&PR Minister in tlawh

I&PR Department hmalakna a NEC atanga sum hmuh hmanga Aizawl Treasury Square-a ‘Lianchhiari Run Multi-Facility Centre’ sak mek chu nimin khan I&PR Minister Lalruatkima chuan tlawhin he hna thawh mek hi Mizoram tan rotling tur a nih avangin theihtawp chhuaha uluk taka sa turin Contractor chu a hrilh.

NSUI in sawrkar an ngen

National Students' Union of India (NSUI) Mizoram chuan kumin kumtir lama sawrkar in SEDP sum hmanga Zirtirtu 157 a lak hnuah Mizoram hmun hrang hrangah Govt. H/S Headmaster Post 49 leh Govt. M/S Headmaster post 77 lai ruak ala awm tih sawiin, heng te a rang lama hnawhkhat turin sawrkar chu an ngen.