Ruahtui tlak that loh vangin Grape thar tha lo

Mizoram-a Grape ching lartu Hnahlan khua chuan kumin-ah ruahtui a hmuh that loh avangin Grape an thar tha thei lo.

Hnahlan Grape Growers Society Secretary Zirliantluanga chuan ruahtui tlak har vangin Grape thar nasa takin a tlem phah nia sawiin, “Grape chawr lai June leh July thla velah ruahtui kan dawng lo a, hei hian nasa takin min nghawng a. Nikum lama quintal 100 chuang thar te pawhin kumin ah chuan quintal 50 emaw lek te an thar a, kumin hian a vaiin Hnahlan hian quintal 600 vel emaw chauh kan thar niin ka hria,” a ti bawk. 

Hnahlan khuaa chhungkaw tam ber hian hun engemaw chen chu Grape chin hi eizawnna atan an lo hmang tawh thin a, mahse a hralhna lamah harsatna a awm avangin Grape huan chu titawpin eizawnna dang an dap a. Tunhnaiah Grape chin hi tharthawh lehin chhungkaw tam tak chuan Grape huan an siamthar leh a ni. 

Hnahlan VCP Lalremruata Cherput chuan kum dangah chuan leilet siam tur hian June leh July-ah te hna an tan thin a, mahse kumin ah erawh leilet siam hunlai vela ruahtui an hmuh loh avangin leilet buh thar a tlem dawn niin a sawi a. “Ruahtui hi August thla vel atang khan kan hmu tan chauh a, chhungkaw engemaw zat chu beidawngin leilet siam pawh an thulh phah a. Tuna siam chhun te pawh hi an buh ei a tling lo mai ang tih a hlauhawm khawp mai,” a ti a. Hnahlan khua hian nikum lam khan buh Tin 20,000 chuang an thar tih a sawi bawk.