Latest News

Vaihlo hmang naupang tam

Global Youth Tobacco Survey-4 (GYTS-4) in a tarlan danin Mizoram thalai naupang, kum 13 leh 15 inkar te zinga za zela 58 te chuan vaihlo an hmang.

September 11, 2021-a Mizoram State Anti-Tobacco Day vawi 8-na puala thuchhuah an siamah National Tobacco Control Prog-ramme a State Nodal Officer, Dr. H. Lian-thangpuia chuan August 17, 2021 North East States Health Minister-te thutkhawm neih ah GYTS-4 hi tlangzarh a nih thu sawiin, GYTS-4 a tarlan a nih danin kan thalai naupang, kum 13 atanga 15 te zinga za zela 58 lai te chuan vaihlo an hman thu leh heng zinga zaa 52.7 te chuan Meizuk sim an duh bakah zaa 50.2 te chuan vaihlo hmuam chi sim an duh thu a tarlang tih a sawi a ni.

He zirchianna hian heng thalai naupang te vaihlo hman tan hun (Mean age of initiation) pawh tarlangin, Sikret chu kum 11.1, Zozial kum 11.5 leh Vaihlo lam atanga siam hmuam chi chu kum 10.1 a nih thu sawiin, “Kan thlalai leh naupang tam tak, vaihlo zuk leh hmuam ti ve rual pawha kan la ngaih loh te zingah hian zuk leh hmuam laka harsatna tawk mek an awm nual a rinawm bakah heng zingah hian vaihlo sim duh si, sim dan kawng hre lo puih ngai ngawih ngawih pawh an awm a rinawm,” ati bawk.

NTCP State Nodal Officer chuan Vaihlo chu ‘Ruihhlo bul tanna kailawn’ tia mithiam ten an lo sawi thu pawh sawiin, “Hetiang tak hian vaihlo lakah kan thalai leh naupang te kan venhim a pawimawh avangin vaihlo khuahkhirhna dan - COTPA, 2003 chuan kum 18 hnuailam hnenah vaihlo leh a kaihhnawih zawrh leh heng kum tling lo te zawrhtir pawh a khap a. Zirna In atanga 100 yards (300 ft) huamchhunga vaihlo leh a kaihhnawih reng reng zawrh a khap bakah nau-pang ten vaihlo leh a kaihhnawih product te awlsam taka an neih theih (easy access) tur zawnga zawrh/chhawp chhuah a phal lo tih a sawi bawk.

Comments

Popular News (Last 30 Days)