Latest News

Myanmar sawrkar inthlakna avanga buaina kal zelah Mizoram-ah raltlan an rawn luh belh zel

Myanmar sipai leh tualchhung mite inkahna a hluar zel avangin Zirtawpni atang khan Myanmar mi raltlan thahnem tak Mizoramah an rawn luh belh a. heng raltlan te lo dawnsawn hna leh lo buaipui hna chu ramri hnaih khua ah ngawrh taka thawh a ni bawk.

Zirtawpni kalta zing khawvar hma atanga Chin National Army (CAN) kaihhruaia Chinland Defence Force (CDF)-te’n Thantlang a Lungler khuaa Myanmar sipai Camp pakhat an beih avanga inkahna nasa tak thleng avangin Myanmar ramchhung atangin Mizoram-ah raltlan an rawn lut mek a, thudaw danin Lungler khua hi Hnahthial District-a Thingsai khaw ep mai a awm niin he inbeihna thawm pawh hi Thingsai atang hian hriat theih a ni a, Myanmar Sipaite hian Helicopter bakah Indo thlawhna 2 tirin Lungler leh a chhehvel khua hi bomb hmangin an bei nia thudawn niin he thil thleng avang hian Thingsai leh a chhehvel khua-ah raltlan 500 bawr vel an rawn luh belh tawh a ni. Thingsai khua-ah hian Lungler inkahna thlen hma khan mi 200 chuang an lo lut tawh a, Zirtawpni khan chhungkaw 32 chuan Tiau lui kan tawh mahse, thenkhat chu khaw chhungah an la lut lo nia thudawn niin Thingsai khaw VCP PC. Remkunga sawi dan chuan tunhnaia an khuaa lut hi 400 chuang an ni tawh a ni.

Cherhlun khaw VCP MC. Zohranga chuan an khua-ah raltlan 52 an luh tawh thu leh nimin lamah an luh belh leh tur thu a sawi a, Bualpui H VCP Lalthanliana pawhin an khua ah mi 2 an luh tawh thu leh midang 11 ten an khua an pan mek thu a sawi a, Old Ngharchhip-ah mi 80 vel lut tawhin nimin lamah luh belh tur an la awm bawk. New Ngharchhip-ah mi 140 an luh belh leh tawh bawk a ni.

Hetihlai hian September 7, 2021-a National Unity Government an tih sawrkarin D-Day an puan atanga nimin thleng khan Champhai District-a Tuipuiral huamchhungah Myanmar raltlan mi 273 an rawn lut tawh bawk a, heng raltlan lo lut tharte hi Myanmar sipai leh CDF/CNA te inkahna leh a bul khua te atangin an ni ber a. Heng raltlan lo lut thar te hi Tuipuiral Group YMA ruahman angin quarantine zawhah Tuipuiral huamchhung khaw hrang hrangah te sem darh zel an ni ang. 

Comments

Chhiar Hlawhte