Online hmanga Transport Department dawrna tur Online Payment System tlangzarh a ni

Mipui ten Online hmanga Chhiah leh Transport Department atanga mamawh pawimawh hrang hrang awlsam taka an neih theihna tur Online Payment System chu nimin khan Transport Minister TJ. Lalnuntluanga chuan Aizawl-a Secretariat Conference Hall-ah a tlangzarh.

Online Payment System tlangzarhna hunah hian Transport Minister TJ. Lalnuntluanga chuan lirthei neitute leh a hmangtute tan Department dawr a awlsam theihna zawngin Department chuan ngaihtuahna nasa takin a seng a, Vawiin ah NIC, SBI leh Transport Department te thawhhona in Online Payment hawn a lo ni ta chu a lawmawm takzet a ni, a ti. Transport Department chuan Online Payment siam tumin hun rei tak hma a lak tawh thu pawh sawiin, buaipui ngai tam tak a awm bakah nikum lam atanga hripui leng avangin duh anga chakin hma lak a harsa a. Chutihrualin, lockdown avangin mipui tan motor kaihhnawih chhiah pek a harsat tak avangin Online Payment chu a hma thei ang bera buatsaih tulna nasa takin a nawr bawk tih a sawi a ni.

Transport Minister chuan Transport Department hmalakna hrang hrang pawh he hunah hian tarlangin, August ni 27, 2021 khan North East Ministers Conference Ports, Shipping and Waterways changtu Union Minister Sarbananda Sonawal kaihhruaia neihah Inland water Transport a Mizoram-in hma kan sawn ve theihna tur thlenin, sumdawnna lamah leh Tourism lama chhawr tangkai a nih dan tur te a thlen tih a sawi a a. Khawthlangtuipui/Tuichawng lui develop-na tur DPR chu pawm sakin Inspection Team rawn tirin hma lak a ni nghal dawn niin a sawi.

Hei bakah hian Chhimtuipui luiah, Hnahthial bul - Tuipui D atanga Lomasu thleng Lawngleng hmanga inkalpawh a nih theihna turin Ministry of Shipping in Techno Economic Feasibility Study E-Tender chhuah tura thurawn a pek angin tunah hian E-Tender chhuah tura peihfel vek tawh a nih thu TJ. Lalnuntluanga chuan a sawi a. National Waterway 102-a puan tawh Tlawng Lui pawh passenger chuan theihna tura Lawng a kalna turin hma a rang lama laksak turin a thlen tawh tih a sawi bawk.

Transport Minister TJ. Lalnuntluanga chuan passenger phur motor ah Vehicle Location Tracking System bun turin Transport Department-in hma a lak mek thu pawh a sawi a. Vehicle Tracking Device vuahna motor-ah chuan passenger ten an sahimna kawnga harsatna an tawh thulha hmeh tur Panic Button invuah an hmeh khan rang takin Transport Department leh Police lamin an hre thei nghal dawn a, a bik takin hmeichhia te himna atan a tangkai dawn hle tih a sawi bawk.

June 5, 2020 khan State Bank of India nen Payment Gateway chungchangah MoU sign niin, Transport Department, SBI leh NIC te tang-kawpin Online payment hi mipui te hman tangkai theih turin an buatsaih a. Online payment hman theihna hi hlawm hnih-ah then niin Vehicle Document kaihhnawih thil pawimawh - Registration, Permit renewal, Duplicate Permit, Tax Payment, Special Permit, Fitness renewal fee, Ownership Transfer Fee, Issue of NOC, Registration renewal, Duplicate registration Certificate leh address thlak te chu parivahan.gov.in/parivahan/ kaltlangin a tih theih dawn a. Licence kaih-hnawih – Learner licence, Driving licence, Conductor licence, Licence renewal, Hming, Address leh thlalak thlak, Duplicate driving Licence leh conductor licence leh Phone number update te sarathi.parivahan.gov.in/sarathiservice/ kaltlangin a dil theih dawn a ni.

Nimin-a he hun hmanna ah hian Transport Department Year Book 2021 chu tlangzarh nghal a ni bawk.