NIT Mizoram harsatna tawh sutkian dan tur H&TE Minister hovin sawiho a ni

Higher and Technical Education Minister Dr. R. Lalthangliana chuan NIT Mizoram Campus, Lengpui a din fel thuai a nih theihna atana ruahmanna leh chak zawka hmalak a pawimawh thu a sawi.

Nimin khan SAD Conference, Aizawl-ah National Institute of Technology (NIT), Mizoram chungchanga hmalak dan tur sawihona hi H&TE Minister Dr. R. Lalthangliana hovin neih a ni a, he hunah hian Minister chuan NIT Mizoram chungchanga hmalakna leh NIT Mizoram Campus, Lengpui a din fel thuai a nih theihna atana ruahmanna leh chak zawka hmalak a pawimawh tih sawiin, Zoram tan, thangtharte, kan tu leh fate tana rotling tur leh hlu tak a nih vangin NIT Mizoram Campus a nih tur ang taka rang taka puitlin tir hi kan tihmakmawh a ni, a ti a. Hemi kawnga tangkai tur sawrkar department zawng zawngte pawh tun aia nasa lehzuala tanrual a pawimawh thu sawiin, “Engtikawng zawng pawhin tihhlawhtlin hi kan tum tur a ni,” a ti.

He hunah hian NIT Mizoram-a Registrar Dr. Lalthanchami Sailo chuan NIT Mizoram mamawh hmasa chu Permanent Campus Lengpui a indin fel vat a nih thu sawiin, Chief Minister bakah H&TE Minister leh EF&CC Minister, Chief Secretary leh Sorkar hotu pawimawhten theihtawp an chhuahpui chungin Forest Clearance tihfel a la ni lova, Central sawrkar, Ministry of Education lam atang pawhin NIT Campus sakna tur a sum pawmsa vek pawh, Forest Clearance a la fel loh avang leh Lengpui a NIT Campus tur ram, LSC chu NIT Mizoram hminga la thlak fel a nih loh avangin an la rawn release thei lo tih a sawi bawk.

He thutkhawm ah hian NIT, Mizoram Campus, Lengpui ami chu Riverine Forest Reserve area a nih vanga Forest Clearance dil a ngaih vanga hmalak ngaite sawiho a ni a, Revenue Department in Re-Survey Report an peihfel veleh rang taka bawhzui dan turte sawiho niin, Land Lease NIT hminga thlak tura tih ngaite inhrilhfiah a ni bawk.

NIT Mizoram hi kum 2010 atangin Chaltlang, Aizawl-ah mimal building luah hawhin bul tan a ni a, tunah hian Academic Department paruk (6)- Electricals & Electronics Engineering; Electronics & Communication Engineering; Computer Science & Engineering; Mechanical Engineering; Civil Engineering leh Basic Sciences, Humanities & Social Sciences awmin NIT Mizoram-ah hian zirlai 670 awmin zirtirtu 25 an awm a, Non-Teaching Staff 18 an awm bawk a ni.

Nimin a sawihona hunah hian H&TE Board Vice Chairman Dr. Vanlaltanpuia bakah sawrkar Department mi pawimawh leh NIT Mizoram hotute an tel a ni.