Latest News

MPCC in OSD to CM Appointment sut leh turin ngen

Mizoram Pradesh Congress Committee (MPCC) chuan Officer On Special Duty (OSD) to Chief Minister tur ruatna chu sut leh turin MNF sawrkar an ngen tih an sawi.

Nimin a thuchhuah an siamah MPCC Media Department chuan MNF sawrkar chuan Rosangzuala s/o F. Lalsanga (L), Luangmual, Aizawl chu Officer On Special Duty (OSD) to Chief Minister atan a ruat nia tarlangin, Govt. of Mizoram hnuaia IAS leh State Service Officer Senior-te post, Secretary Rank-ah dahin, Secretary-te hamthatna dawn ang zawng zawng a dawng dawn tih an tarlang.

Eng sawrkar hnuaiah pawh Chief Minister puitu tur Adviser leh a dangte ruat chu kal-phung pangngai a ni tih sawiin MPCC chuan, amaherawhchu, IAS leh MCS Senior post tur niawm tak, Officer On Special Duty atana MNF Gen. Headquarters Adviser dah a ni chu thil thleng ngai lo tak a nih thu leh Mizo thalaite Competitive Exam hmachhawn tura kan infuih lai mek leh, Mizoram Youth Commission pawhin a bika training pek engemawzat a neih laia Officer Post-a MNF Adviser dah a ni chu a mak takzet tih an sawi.

MPCC thuchhuah chuan MNF sawrkar hnu hian Mizo thalai, lehkhathiamte tana bei-dawnna tur thil a thleng ta fo tih pawh tarlangin, Congress sawrkarin MPSC kaltlanga dik taka sawrkar hnathawktu tur a lak thinte duhkhawp lovin Mizoram Subordinate Service Selection Board (MSSSB) din a lo nih tawh thu leh, Advertisement pawh chhuah lovin zirtirtu leh sawrkar hnathawk dang za tam tak an la tawh niin an tarlang a, MNF sawrkar chet dan chuan Mizo thalai, lehkha-thiamte ah beidawnna a thlen ang tih an hlauh thu sawiin, “Tuna appointment mak tak a pek pawh hian Mizo Officer rualte leh thalai lehkhathiamte a tih hnual kan hlau hle a, appointment hi sut leh turin MNF sawrkar kan ngen a ni,” an ti.

Comments

Popular News (Last 30 Days)