Latest News

MYC IAS Full Sponsorship Candidates, 2021 te fuihna hun Deputy CM hovin hman a ni

Mizoram Youth Commission (MYC) IAS Full Sponsorship Candidates, 2021 ten Prelims Coaching Class an kal zawh denchhenin nimin khan anmahni fuihtharna leh an kal zelna tura duhsakna hlanna hun Deputy Chief Minister Tawnluia hovin hman a ni.

Planning & Programme Implementation Department (RDB) Conference Hall-a he hun hmanna ah hian Deputy Chief Minister chuan India ram puma inelna sang ber UPSC Exam chu hun rei tak chhung Mizo te zingah paltlang an awm lo chu inchochhuah a ngai tih a sawi a. UPSC Exam bei tura thlanchhuah mi 20 te chu midangte tana sulsutu an nih a pawimawh thu sawiin, taimakna leh tumruhna nena Exam hmachhawn turin duhsakna a hlan a. Mizoram tana rawngbawltu nihna kawng pawimawh tak a ni a, ram tuihalna hria a beidawng hauh lova exam zel turin a fuihbawk. Deputy Chief Minister chuan sawrkar chuan a theihtawp a chhuahsakna chu pawm thiam a, ram tan, hnam tan a ni tih hriaa finna leh thiamna ti pung zel tur leh beidawnna chu hmelma a ni tih rilru a pu reng turin a fuih a, an kalzelna turah duhsakna a hlan bawk a ni. Deputy Chief Minister chuan sawrkar in thalaite chawikanna kawngah theihtawp a chhuah tur thu leh Central Service-a thalai te an luh tam theihna tura tun aia lian leh zau zawka sponsorship program pawh hi kalpui tum a nih thu a sawi bawk.

MYC IAS Full Sponsorship Candidates te hi mi 20 niin ALS Coaching Centre, Delhi-ah mi 10 admit an ni a, Chanakya IAS Coaching Centre, Delhi-ah admit an ni bawk a. February thla khan Delhi-ah Class Offline a kal tanin, COVID-19 avangin April thla lai hawl atangin online a kalpui an ni a. August ni 30, 2021 khan Video Session te zawhfel a ni. ALS Coaching Centre leh Chanakya IAS Coaching Centre, Delhi te hian Online Test vawi engemaw zat an buatsaih sak bawk a ni. MYC IAS Full Sponsorship Programme a kal te hi sum sen awmna, hawna leh kalna leh ei leh in man sawrkarin a tumsak vek a, a vaia sum sen zat hi cheng nuai 50 a ni.

Nimin-a he hun hmanna ah hian MYC Chairman Dr. Vanlaltanpuia chuan kalkawmte lo lawmin Chief Secretary Lalnunmawia Chuaungo chuan fuihna thu sawiin, theihtawp chhuahna ah hlawhtlinna a awm a, vawikhat exam-a UPSC paltlang chu tlemte an ni tih sawiin, hlawhtlin hma chu bei zel turin a fuih bakah lehkha zir dan kalhmang tha leh Smart Study pawimawhna te a sawi a. Central YMA President leh MSU President ten thuchah tawi an sawi bawk a, hemi hnu hian zawhna leh chhanna (interactions) hun hman a ni bawk.

Comments

Popular News (Last 30 Days)