Latest News

Hri kai mi 62 hmuh belh leh

Nimin khan Serchhip District-ah COVID-19 hri kai mi 62 zet hmuhchhuah belh leh an ni a, hri kai hmuhchhuah thar zinga a tam zawk te hi Serchhip khawpui chhung ami te niin Khaw-bel-ah mi 13 hmuh belh an ni a, Thenzawl-ah pawh hri kai pakhat hmuh a ni bawk.

Lunglei-a RT-PCR Laboratory din tura hma an lak dan sawrkar in a puangzar

Mizoram sawrkar-a Health & Family Welfare Department chuan thuchhuah siamin Gauhati High Court thupek bawhzuia Lunglei-a RT-PCR Laboratory din tura hma an lak dan an tarlang.

He an thuchhuah siamah hian Gauhati High Court, Aizawl Bench in Lunglei-a RT-PCR Laboratory din a nih theihna tura Public Interest Litigation (PIL) mi thahnemngai ten an thehluh chungchanga August ni 4, 2021-a thutlukna (Judgment Order) a tichhuah hnuah, he Judgement Order-ah hian Sawrkarin Lunglei-a RT-PCR Laboratory tur a ruahman mek sak zawh a nih hmaa lo hman lailawk turin RT-PCR Laboratory din a remchan dan ngaihtuah turin thu a pe tih an tarlang a. Mizoram sawrkar-a Health & Family Welfare Department chuan High Court thutlukna hi rang taka bawhzui nghalin August ni 9, 2021 khan Principal Director, H&FW Chairman-na hnuaiah RT-PCR Laboratory chungchanga hmala tur Committee dinin, he Committee hi a tuk August ni 10, 2021 khan tilianin Member ruat belh an ni tih an tarlang.

High Court in Lunglei Tourist Lodge emaw, hmun dang remchang Laboratory dinna tur atan hian en tura a tih angin August 3, 2021 khan he Committee din thar hian Lunglei an tlawh nghal thu leh, Lunglei Tourist Lodge pawh a hmunah enfiah nghal niin Committee Member zinga mi Civil Hospital Lunglei-a Medical Superintendent chuan, Lunglei-a mimal leh sawrkar building ruak remchang dang ni a an hriatte a lo dawr tawh thu report a pek thu leh amaherawhchu heng building ruak an en te hi a neitute lam atanga remtihna an hmuh theih loh avangin Lunglei Tourist Lodge-ah hian RT-PCR Laboratory din tura hmalak mai Committee hian tha an tih thu leh sawrkar ah Inspection Report chipchiar tak ziakin an thehlut tih an tarlang a.

Committee in report an thehluh hi bawhzui niin September ni 7, 2021 khan Tourism Department-ah Lunglei Tourist Lodge hman phal dilna ziakin thlen a nih thu te, tawngka chuan phalna hmuh tawh niin, ziaka chhanna ngaihchan mek a nih thu leh RT-PCR Laboratory hi Hospital Premises pawna din tur a nih vangin Indian Council of Medical Research (ICMR) ah September ni 7, 2021 vek khan RT-PCR Laboratory din an remtihna dilin, September ni 10, 2021 khan lehkha hi thawn nawn leh niin chhanna ngaihchan mek a nih thu te an tarlang.

Hei bakah hian Lunglei Tourist Lodge-a RT-PCR Laboratory dinna tur hian estimate pawh siam tawh a nih thu leh, Room Layout leh hmanrua leh bungrua (equipments) mamawhte pawh ruahmanna siam fel vek tawh a ni tih tarlangin, Lunglei Tourist Lodge panna kawng hi a ngheh loh avangin lirthei tlan tir a him loh thu leh, ICMR atanga phalna hmuh a nih veleh siam tha tura dilna Mizoram sawrkar-ah thlen a nih tur thu an tarlang bawk.

Comments

Chhiar Hlawhte