Latest News

Mizoram atanga Assama lirthei lut dap thin chungchang sawrkar laipui-a thlen turin ngen

Congress Legislature Party (CLP) Leader Zodintluanga chuan Assam sawrkarin Mizoram atanga Assama lirthei lut reng reng te drugs phurhruk chhuanlama an dap thin chungchang chu sawrkar laipui-ah thlen ngei turin Mizoram sawrkar chu Assembly House kaltlangin a ngen.

Nimin-a Mizoram Legislative Assembly Session neih chhunzawm CLP Leader Zodintluanga chuan Special Mention hun a hmang a, July ni 26,2021-a Assam Police leh Mizoram Police te Vairengte daia an in kah hnu lawk July ni 29,2021 atanga Assam sawrkarin Mizoram atanga Assam-a lirthei lut reng reng drugs tlawhruk venna tur chhuanlama a dap thin chungchang sawi chhuakin, khualzin pawisawilo te zahawmna leh zalenna tiderthawng zawnga hetianga hmalakna Assam sawrkarin Mizo khualzinte laka a nei chu ngaih thutak hle tur nia a hriat thu a sawi a, Assam sawrkar chet dan chu Fundamental Right bawhchhiatna dik tak a ni tih leh hemi chungchang sawrkar laipuiah thlen turin Mizoram a ngen bakah, High Court emaw, a tul a nih chuan Supreme Court thlenga zualkona tur a nia a hriat thu a sawi.

Zodintluanga Ralte chuan, Assam Police ten August 17, 2021-a Bilkhawthlir Bus neitu F. Lalrotluanga an man chungchang pawh sawi telin, F. Lalrotluanga chu a Bus-ah Assam Police ten Heroin an man nia sawiin, Silchar Jail-ah a tang mek a. Amah hi Drugs nena inhnamhnawih ngailo niin amah hrechiangtute’n sawi mahse a motor-ah a hmuh loh laia Drugs dah ruin, Assam Police ten an man a ni, a ti a. F. Lalrotluanga vanduaina ang chu Mizo mipui dangin an tawh ve theih a ni tih sawiin, chutiang a thlen hmaa Mizo mipuite thlavang hauh a, hmala thuai turin Mizoram sawrkar a ngen tih a sawi bawk.

CLP Leader Zodintluanga'n Special Mention a neih chungchang hi Assembly Speaker sawmna angin House Leader, Chief Minister Zoramthanga chuan sawi belhin, Mizoram atanga Assam-a lirthei lut reng reng te Drugs phurhruk chhuanlama an dap thin chungchang titawp turin Assam sawrkar chu tum thum lai lehkha an thawn tawh thu a sawi a, Bilkhawthlir pa F. Lalrotluanga Assam Police ten an man chungchangah pawh Assam sawrkar-ah complaint an lo thlen tawh thu te, chhanchhuah tumin a theih ang anga puih pawh an in huam thu te a sawi bawk. Chief Minister chuan, Mizoram chin hum turin huaisen takin theihtawpa hma an lak tawh thu leh dik takin, dan bawhchhe lovin tan lak zel sawrkar in a tum thu a sawi a, Assam lamin ramri chungchang ah Dan an rawn bawhchhia a nih chuan a tul ang zelin tan lo lak ngei pawh an tum tih he hunah hian a sawi bawk.

Comments

Popular News (Last 30 Days)