Home Minister in Zirna a tithate lawmpuina hlan

Hrangturzo bialtu MLA leh Home Minister, Lalchamliana chuan kumin HSLC leh HSSLC Exam result chhuaka a bial chhunga Zirna In leh Zirlai tithate hnenah lawmpuina sumfai a pe.

Home Minister Lalchamliana chuan Zirna chu ram hmasawnna hnuk hnai ber a nih avangin Sawrkar pawhin hrileng karah theihtawp chhuahin zirlaite tan zirna tha kalpui dan tur a ngaihtuah thin tih sawiin, chutianga harsatna karah a bial chhung atanga zirlai leh zirna In engemaw zatin hlawhtlinna hlu tak an hmu chu a lawmpui thua sawi a, an hmalam hunah hlawhtlinna sang zawk nei tura tan la zel turin duhsakna a hlan a ni. Home Minister chuan tunlai hrileng in a bial chhung - East Lungdar, Biate leh Keitum khua te a tuam mek chu pawi a tih thu leh damlo te chu lo dam thuai tura a duhsak thu a sawi bawk.

Hrangturzo Constituency atang hian Zirna In HSLC leh HSSLC Exam result chhuaka zirlai pass vek (100%) leh Zirlai titha Distinction a pass te hnenah lawmpuina hi hlan niin High School pali (4), HSLC-a 100% pass te hnenah Rs. 20,000/- theuh hlanin HSLC Distinction a pass zirlai 26 te Rs. 2,000/- theuh pek an ni a. HSSLC-a 100% pass thei School pathum te Rs. 20,000/- theuh pein Distinction a pass Zirlai panga (5) hnenah Rs. 3,000/- theuh pek an ni bawk a. Zirna In leh zirlai tithate lawmpuina hi Bial chhunga khawtlang hruaitute leh zirna In hotute kaltlanga sem a ni. Home Minister hian a bial chhunga hri kai te enkawlna atan CCC, Biate-ah Rs. 60,000/- leh CCC East Lungdar-ah Rs. 40,000/- chu CLTF kaltlangin a hlan bawk a ni.