Latest News

Lo leh huan atana ram inhawh tirna dan pawm

Lo leh huan siamna atana Ram inhawhtirna dan, The Mizoram Agricultural Land Leasing Bill, 2021 chu nimin-a Assembly Session-ah lungrual taka pawm a ni.

He bill puluttu Agriculture Minister, C. Lalrinsanga chuan, he Bill hi NITI Aayog-in a pawmpui Model Land Leasing Act, 2016 behchhana Mizoram mil tura duan niin, loneitute tan liau liaua ruahman a nih thu leh hmasawnna rahbi an rah theihna tura thil pawimawh tak a ni tih a sawi a. C. Lalrinsanga chuan, India ram chhungah Dan mumal a awm loh avanga ram an chan mai hlauhthawnna avanga an ram tha tak tak midang hnena hawh tir phallo leh ram ruak hman tangkai theihloh a awm nual ni-a sawiin, ram neilo Lo neituten ten midang ram an hawhin tawngkaa sawifel a nih thin avangin Sawrkar atanga tanpuina, Subsidy leh Loan chi hrang hrang an dawn theih loh phah thin a, chu chu hmasawnna daltu a nih avangin ramneitu leh hawhtuten lungrual taka hma an lak theih chu a pawimawh tih a sawi bawk.

Agriculture Minister chuan, Mizoram-ah ngei pawh mahni ram midang kuta dahtu zingah duhthusam anga hlawkna tel phalo an awm nual tih sawiin, pachhiat avanga mahni ram hmang tangkai thei lo an awm nual avangin an Leilet leh hmunhma enkawl thei lo leh enkawl hmanlo ten Dan fel tak hmanga inremsiamna hnuaia hlawkna an tel theih dan tur Dan felfai tak neih chu tih makmawh a nih avangin he ruahmanna hi siam a nih thu a sawi a. “Dan thar hnuaiah hian thalai hmalak tum te tan pawh kawng zau tak a inhawng dawn a, Farm Mechanisation hmang khawl chi hrang hrang nen inkaihhruaina fel tak hnuaiah ram hawhtu leh neitute tana hlawkna inhawng tur hi a phurawm hle a ni,” a ti. He Bill hi Member ten an sawiho hnuah lungrual taka pawm a ni.

Comments

Chhiar Hlawhte