Latest News

Cricket Final khel dawn

Cricket Association of Serchhip District in an buatsaih, Serchhip District Cricket League vawi khatna chu Vawiin chhun dar 12:00 hian Final khelh a ni dawn ta a, Tuikhuah Veng CC leh AO3C ten Final hi an khel dawn a ni. He inkhel hi TV lamah en theih tura pekchhuah leh a ni dawn a ni. Vawiin a Final khelh hi Cricket Association of Mizoram hotute pawhin an rawn hmanpui dawn a ni.

Mizoram-ah CSS Hindi zirtirtu 541 leh Middle School Headmaster 24 lak thar an ni

School Education Minister Lalchhandama Ralte chuan CSS Hindi zirtirtu 541 leh Middle School Headmaster 24 lak thar an ni tih sawiin, High School Headmaster 62 te kaisan tir an nih thu a sawi bawk.

Kumin-a India rama Zirtirtute ni, Spetember 5, 2021 puala thuchah a siamah School Education Minister Lalchhandama Ralte chuan Zirtirtute chu Zahna Chibai bukin, Teachers' Day chu mi thiam, mi fing leh President hial lo ni tawh Dr. Sarvepalli Radhakrishnan-a piancham apianga hman thin a nih thu leh, kum 1962 atanga hman tan niin kumin hi a vawi 60-na a nih thu a sawi a. Mizoram sawrkarin hripui leng karah pawh zirna a ngaih pawimawh thu a sawi a, zirlaite hmakhua ngaihtuahin Zirtirtu indaihlohna phuhruk kawngah nasa takin hna a thawk tih a sawi bawk.

Education Minister Lalchhandama Ralte chuan Zirtirtute chu ram leh hnam hmasawnna leh changkanna kawng min zawh tirtu an ni tih sawiin, chawimawi an phu tih a sawi a, “Zirtirtute hna hi a pawimawh em em a, nakin maia ram hruaitu tur leh eizawnna kawng dap thei tura zirlai naupangte kawng kawhhmuha, hruaitu hna ropui thawktu an ni a, chuvangin sawrkarin an pualin ni bik a siam hial a ni,” a ti a. Kumin Zirtirtute ni chu Pathianni anih avang leh hripui leng avangin ropui taka lawm a remchang lo tih pawh sawiin, hun hmasa lamah te chuan an pualin programme siam thin a nih thu leh, nikum leh kumin ah Zirtirtute ni hi COVID-19 hripui leng avangin a huhova hman a rem ta lova, Zirtirtu zahawm tak tak leh zoram mipuite hriattthiamna an dil tih a sawi bawk.

School Education Minister chuan State Working Committee ten Zirtirtu damlo ramchhung leh rampawn ami te tanpuina tur sum a lakkhawm thu pawh sawiin, Zirtirtu 37 hnenah tanpuina pek an nih thu a sawi a. Kumin Independence Day-ah Zirtirtu 3 hnenah State Award hlan an nih thu pawh sawiin, National Award to Meritorious and Outstanding Teacher chu Jacinta Vanlalengzami, Headmistress, A&M Grandchild School, North Vanlaiphai in a dawng tih a sawi bawk.

Minister chuan Zirtirtute chu an thlen chin theuhah hmasawna, chhuan lo la awm leh zel tur hnenah an thiamna leh an theihna hlan thar zel turin leh inpekna thar nen thawk chhunzawm turin a ngen bawk.

Comments

Chhiar Hlawhte