Latest News

Hlawhchham chhan ah Health Minister puh

Mizoram Pradesh Congress Committee (MPCC) chuan COVID-19 dona kawngah MNF sawrkar chu hlawhchham ah puhin a mawhphurtu lian ber chu Mizoram Health Minister Dr R.Lalthangliana a ni, an ti.

Inrinni-a Aizawl Press Club-a thuthar thehdarhtute an kawmna ah MPCC Spokesperson Dr Lallianchhunga chuan he thu hi sawiin, Mizoram Health Minister Dr R.Lalthangliana chu politics khelh nan COVID-19 a hman luih tlat avang leh RT-PCR a do tlat avangin tun thlengin Mizoram in RT-PCR Laboratory kan neih belh thei lo tih a sawi a. Damloh vang leh zirna sang pan-a State pawn a kal tur reng rengin RT-PCR test nei turin Mizoram hmun hrang hrang atangin ZMC pan khawm zel ala ngai chu Health Minister in a tihtur a tih that duh loh vang a ni, a ti bawk.

MPCC chuan Health Minister chuan hripui dona kawngah theih-tawp chhuah angin inlantir mahse a mawhphurhna a hlen zo lo hle nia sawiin, “ Chief Minister berin COVID-19 do nan sum a pe tha em em chungin Health Department sum hman dan hi Emergency a sum endik (audit) ngai rum rum khawpin a siam a, RT-PCR khawl a do tlat avangin Lunglei Civil Hospital-a RT-PCR khawl bunna tura hmalatu zing a mi Lunglei Thalai Pawl aiawhte pawh a hmu duh ngai lova. A mawhphurhna a hlen zawh loh em avangin India ram State dang tam takin COVID-19 an do hneh tawh laiin mipui thuawih berna ram, Mizoram chu COVID-19 vei lai tam ber pawl kan ni ta reng a. Mizoram economy-in nasa takin a tuar a, chhungkaw tam tak eizawnna in a tuar a, sumdawnna tam tak tihtawp a ngaih phah hial a ni,” an ti a. “Health Minister hian heng zawng zawng hi a hlawhchhamnaah pawm se, Health Minister a nihna hi mi thar chak zawk kutah hlan tawh mai rawh se tiin kan ngen a ni,” tiin he an ngenna hi Chief Minister pawhin min lo ngaih pawimawh sakin COVID-19 hripui dona kawnga mipuite that tlanna ber tura thutlukna siam thuai turin an ngen tih an sawi bawk.

Comments

Chhiar Hlawhte