Latest News

Health Minister hovin Health Department hotuten COVID-19 dona kawnga hmalak dan an thlirho

Health Department hotute chuan Inrinni khan Health Minister Dr. R. Lalthangliana hovin COVID-19 hrileng dona kawnga hma an lak dan an thlirho a, COVID-19 hripui leng dona atana thawktute mamawh hmanrua leh damdawi dinhmun a that thu tarlan a ni.

SAD Conference Hall-a he thlirhona hunah hian Health Secretary R. Lalramnghaka bakah Health Department hotu pawimawhte telin COVID-19 hripui leng dona atana thawktute mamawh hmanrua leh damdawi dinhmun a that thu tarlan niin, PPE kit bik chu nitin 400 vel hmangral anga chawhrual a ni a, tunah hian ni 4 chhung daih chiah awm tawhin, Commerce & Industries hmalakna in tualchhunga PPE thui engemawzat hmuh belh thuai a nih dawn vangin a thlaphanawm loh a ngaih a ni a. N-95 Mask pawh nitin 400 vel hmanral anga chawhrual niin tunah hian thla 2 daih a la awm a, 3-Layer Mask chu nitin 700 vel hmanral niin thla 10 daih a la awm a, Kutkawr (gloves) pawh nitin 920 vel hmanral niin thla 9 daih a la awm a, Hand Sanitizer pawh ni 100 daih la awmin Sodium Hypochloride pawh thla khat daih a la awm a ni. Viral Transport Medium (VTM) pawh nitin 1500 vel hmang anga chawhrual niin thla 6 daih a la awm a, Rapid Antigen Test kit chu nitin 12000 hmanral anga chhutin thla khat daih a la awm bawk a ni.

He hunah hian thawktu indaihlohna, a bik takin Specialist Doctor-a manganthlak thu tarlan niin, an hlawh tur ruahman sa vek pawh ni mahse a thawk thei tur Qualified Doctor an awm meuh loh avangin a buaithlak hle tih tarlan a ni a. Dedicated COVID Hospital-Zoram Medical College tawt lutuk chhawk zangkhai tura ruahman, Khum 50 awmna MRB DCHC, MINECO leh Khum 40 awmna Kulikawn Hospital DCHC chu a khat deuh reng tih tarlan a ni bawk a. ZMC chu August thla laihawl vela an ziaawm viau hnuah tunhnai kar hnih chhung vel atangin damlo admit an pung nasa leh hle a, COVID Ward leh ICU pawh an khat leh deuh reng tawh tih tarlan a ni bawk.

Hrisel tha tak tak, insawiselna nei miah lo nunna chan an awm nual tawh tih ZMC hotute chuan sawiin, hei hi a chhan ni bera lang chu CO-VID-19 hi virus thar a nih avanga kan taksaa raldotute in an la hmelhriat loh avangin lo beih dan tawk tur an hre thin lova, mitin in he virus kan dolet dan hi a in ang lo thin a, mi thenkhatah chuan nasa taka he virus hi taksa raldo khawl ten an lo beih avangin taksa peng pawimawh dang (vital organs) ten a tawrh phah thin a, hei hi mi then-khat chuan an tuar zo lo thin a ni, an ti.

Health Department hotute thukhawm chuan COVID-19 hri in nasa takin mipuite rilru leh ngaihtuahna a nghawng a ni tih sawiin, hri kai leh hri kailo zingah pawh COVID-19 vanga rilru lama harsatna neite chuan inthlahrung hauh lovin Mental Health Specialist te be thin turin an ngen a, District tinah heng mithiamte hi an awm vek a ni tih an sawi.

He thutkhawm ah hian COVID-19 Third Wave lo thleng thei chungchangah Sawrkar inpuah-chah dan ngaihthlak a ni a, District tinah Child-Friendly COVID Care Centre siam turin chak taka hma lak reng a nih thu tarlan niin uar zawka inzirtirna kalpui turin ruahmanna kalpui a nih thu leh sawrkar laipui atanga tih tur an rawn tukte chak taka bawhzui zel a nih thu tarlan a ni.

COVID-1h hri kai Home Isolation-a awmte zingah inkaihhruaina Dan siam zawm that loh vanga chhungkua a hri inkaichhawng an tam tih pawh he hunah hian tarlan a ni bawk a. ZMC-a hman tur CPWD in Oxygen Plant 1000LPM an siam mek chu zawhfel thawkhat tawh niin, Oxygen Plant dang 300LPM pawh Oxygen Pipeline Final Check nei turin phai lama Engineer te chah mek an ni tih tarlan a ni bawk.

Comments

Chhiar Hlawhte