Latest News

Mizoram-ah COVID-19 hri kai hmuh belh zel an ni

COVID-19 hri kai hmuhchhuah chu Mizoram-ah an la pung zel a, niminpiah khan Sample 11,599 enfiah leh niin heng atang hian hri kai 1402 hmuhchhuah niin Sample enfiah atanga za zela 12.10 te chuan hri an kai a ni.

Niminpiah khan ZMC-a RT-PCR Laboratory-ah Sample 1765 enfiah niin heng atang hian hri kai 287 hmuhchhuah an ni a, an vai hian Aizawl District atanga Sample lak vek niin hri kai mi 20 aia tam hmuhna Veng leh khua pali awmin hri kai 10 leh 20 inkar hmuhna Veng 4 a awm bawk a, a bak zawng hi Veng leh khua 47 ami te an ni. Fluorescent Immunoassay (FIA) Test hmanga Sample 160 enfiah atangin hri kai 17 hmuh ni bawkin an vai hian Aizawl khawpui chhung ami an ni.

District hrang hranga TrueNat Laboratory-ah Sample 302 enfiah ni bawkin heng atang hian COVID-19 hri kai 50 hmuhchhuah an ni a, an zinga mi 19 te chu Lunglei District-a hri kai hmuhchhuah niin Champhai District-ah hri kai mi 11 hmuh an ni a, Mamit District-ah 7, Lunglei leh Khawzawl District-ah 5 ve ve leh Aizawl District-ah hri kai mi 3 hmuh an ni bawk.

Rapid Antigen Test hmangin niminpiah khan Sample 9372 enfiah ni bawkin heng atang hian hri kai 1048 hmuh an ni bawk a, an zinga 472 te chu Aizawl District-a hri kai hmuh te niin Republic Veng Restricted Area-ah hri kai mi 42 zet hmuh belh an ni a, Hunthar-ah pawh hri kai mi 26 hmuh ni bawkin Edenthar-ah mi 21 hmuh an ni bawk a, hri kai mi 10 leh 20 inkar hmuhna Veng leh khua 6 awmin a dang te hi Veng leh khua 75 ami te an ni.

Heng bakah hian Siaha District-ah hri kai mi 265 hmuhchhuah ni bawkin Serchhip District-ah hri kai 78 hmuh an ni a, Mamit District-ah pawh hri kai 57 hmuh ni bawkin Lunglei District-ah 56, Lawngtlai District-ah 46, Champhai District-ah 34, Kolasib District-ah 15, Hnahthial District-ah 15, Khawzawl District-ah 8 leh Saitual District-ah hri kai mi 2 hmuh an ni bawk.

Mizoram-a COVID-19 hri kai enkawl zingah nimin khan mi 925 te chu hri lakah fihlimin anmahni enkawlna hmun atanga chhuahtir an ni ve leh bawk a, heti hian nimin tlai dar 5:00 thlenga Mizoram-a hri kai hmuhchhuah chu 75,470 niin an zinga 62,172 te chu enkawl dam an ni tawh a, hei hi hri kai hmuhchhuah atanga chhutin za zela 82.38 niin hri kai enkawllai 13,047 an awm mek a ni.

Nizan hmasa dar 8:50 vel khan Lalngaihawma (63), Venghnuai Aizawl chu COVID-19 vangin ZMC-ah a boral ve leh a, ani hi Venghnuai Local Council Chairman nilai leh Local Level Task Force Chairman nilai a ni a, nimin tlai dar 2:45 khan R. Lawmthanga (84), Theiriat Lunglei chu boral ve lehin Mizoram-a hri kai zingah mi 251 an boral ta a ni.

Comments

Chhiar Hlawhte