Latest News

Mamit-ah RIDF chungchang inhrilhhriatna nei

Nimin khan Mamit-ah Rural Infrastructure Development Fund (RIDF) chungchang inhrilhhriatna hun buatsaih a ni.

National Bank for Agriculture and Rural Development (NABARD) Mizoram Regional Office buatsaiha RIDF chungchang inhrilhhriatna hun hi Mamit DC, Dr. Lalrozama chuan hmanpuiin Mamit District chhunga NABARD kaltlanga hmasawnna hna kal mekte chu a nihna ang taka kalpui turin Line Department hrang hrangte chu a chah a, hmasawnpui ngei tura kan duh te'n hlawhtlinna an chang ngei em tih chu inzawt nawn fo tura a duh thu a sawi bawk.

He hunah hian Kolasib leh Mamit District bialtu NABARD-a DDM, JD. Traite chuan RIDF chungchang hi zirtirin, RIDF chu Sawrkar laipui leh RBI te'n NABARD kaltlanga an kalpui a nih thu a sawi a, RIDF kaltlang hian hna peng hrang hrang 37-ah te Loan pekchhuah niin, Loan punna a tlem avang leh buaipui a awlsam avangin a remchan thu a sawi a. Mamit District chhunga RIDF Project-in a huam tel Department hrang hrangte chu RIDF kaltlanga hamthatna awmte ngaihven tura chahin, hmasawnna ruhrel siam kawngah thahnemngai taka thawhhopui ah a sawm bawk. RIDF hnuaia Project hrang hrang kalpui tawh leh kalpui mekte a tarlan bakah Warehouse Infrastructure Fund (WIF) kaltlanga hmalaknate a tarlang bawk.

Mamit District chhung bikah Project kallai mek 35 awmin RIDF Loan cheng vbc. 87.12 senna tur a ni a. Implementing Department - PWD, PHE Department, School Education Department, H&FW Department, Soil & Water Conservation, AH&Vety leh Agriculture Department hnuaiah thawh mek a ni, heng bakah hian Warehouse Infrastructure Fund (WIF) hnuaiah cheng vbc. 6.82 hu WIF Loan senna tur Project panga, Line Department hrang hrang - FCS&CA, Horticulture leh Agriculture Department te'n thawh mek a ni bawk. NABARD chuan Mizoram State pumpuia RIDF Project ( I to XXVI) kaltlangin Project pawmpui 641 thawh nan Loan cheng vbc. 1596.35 a sanction tawh a ni.

Comments

Chhiar Hlawhte