Chanchin thar thenkhat :

Buhfai tha bik vailiam

Mamit District chhunga Sawrkar enkawl School hrang hranga Mid-Day Meal atana sem tur buhfai tha bik leh hrisel bik, Fortified Rice chu nimin khan Mamit DC Dr. Lalrozama chuan Mamit-a FCS&CA Godown atangin a vailiam a, he hunah hian Bawrhsap chuan Mamit District chhunga zirlai naupangte tana buhfai tha bik leh hrisel bik, naupang thanglaite tana an Thluak tichaktu tur semchhuah a ni chu lawmawm a tih thu sawiin, Aspirational District hnuaiah hriselna ngaihpawimawh a nih angin hmasawnna hmel-thar an hmuh ngei a beisei thu a sawi bawk. Mid-Day Meal atan hian kum 2021-2022 chhungin Mamit District chhunga Sawrkar enkawl zirna In hrang hranga semchhuah tur Fortified Rice hi 3205.51 MT a ni a. Fortified Rice hian thisen tlak-chhamna (Aneamia) lakah min veng thei a. Vitamin (B12) taksa mamawh a pai tam hle a, Iron Folic Acid leh Vitamin B-12 pawlh belh atanga buhfai ei theih tha zawk leh chak zawk niin buhfai pangngai nen a tui dan a danglam chuang lo a ni.

PMGSY Contractor kokhawm

Kolasib District Bawrhsap Dr. H. Lalthlang-liana chuan Kolasib District chhunga Pradhan Mantri Gram Sadak Yojana (PMGSY) hnuaia Bilkhawthlir – Chawnpui – Saiphai inkar kawng siam hna chak zawk a thawh a nih theih nan nimin khan thawktute a kokhawm a, hna zawh hun tur bituk chhunga zo thei lo leh vawi engngemaw zat hun bituk pawhsei ngai a ni thin chu pawi a tih thu sawiin, hna chak zawka kalpui a nih theih nan hna vilpuitu tur Team din a nih thu a sawi a. He Team-ah hian Magistrate, PWD hnuaia SDO, Police leh Sub-Hqrs. YMA Kolasib-a hruaitute zing a mi ruat an nih thu a sawi bawk.

He hunah hian Contractor-te hri leng leh ramri buai avanga hna duh anga an kalpui theih loh thu leh harsatna an tawh thin te an sawi a, an hna chanpual theuhte zo thei tura an inbeisei hun chhinchhiah a ni bawk.

Vbc. 29 bawr vel hmuh beisei

SEDP hnuaia Veterinary, Fishery and Sericulture Board Vice Chairman C. Lalmuanpuia chuan niminpiah khan sawrkar laipui Ministry of Fisheries, Animal Husbandry & Dairying-a Joint Secretary (LH), Upamanyu Basu chu dawrin tunlai Vawk pul hri hlauhawm tak, African Swine Fever chungchanga Mizoram in a tawrh nasat zia te thlenin Central Assistance (puihna) awmthei chungchang a sawipui a, Central atang hian cheng vbc. 29 bawr vel tanpuina hmuh beisei a ni tih sawrkar thuchhuah chuan a tarlang.

ZPM in ramri-a duty te tlawh

ZPM Party chuan Sept. 11, 2021 khan an hruaitu ten Assam leh Mizoram ramri a Mizo-ram Police duty, Saihapui V, Buarchep leh Chuhvel amite chu an duty-na hmunah an tlawh tih sawiin, ramri-a Police duty ten tui intur tha an nei lo tih an sawi bakah, chaw chhumna tur pawh an neih loh avangin Vairengte-ah chaw chhumin nitin zing leh tlai ah an eitur pek chawp an ngai tih an sawi a. Hei bakah hian Electric an la neilo tih pawh sawiin, Medical Routine check-up pawh neih mumal a ni ngai lo tih an sawi.

Sports Minister in sawrkar laipui a dawr zui zel

Mizoram Sports Minister Robert Romawia Royte chuan nimin khan Niti Ayog CEO, Amitabh Kahn chu New Delhi-ah kawmin Mizoram in chak zawka hma a sawn theih nan hma-sawnna sum lian tham a mamawh dan te a sawipui a. Ministry hrang hrang hnuaia Scheme atangin sum a tam tawk theih loh avangin Mizoram hma-sawnna project hrang hrang te chu Externally Aided Project (EAP) atanga sanction vat a nih theih nan tan lakpui ah a sawm a. Niti Ayog CEO chuan rang taka hma a lo lak zui nghal tur thu Minister hi a hrilh a ni.

Sports Minister hian Union Sports Secretary Ravi Mittal pawh kawmin DPR te a thehlut nghal a. Hun reilote chhunga Mizoram tana sum a lo sanction sak chu lawmawm a tih thu hrilhin Robert Romawia chuan, tun tuma a DPR thehluh te pawh sanction lo tihfel sak a tiam avangin Union Sports Secretary chu lawmthu a hrilh bawk.

NH. 44 (A) kawng thalo tlawh

Aizawl atanga Mamit panna kawngpui NH. 44(A) Dampui leh Dapchhuah inkar kawng chhia chu nimin khan Mamit Sub-Hqrs. YMA leh Mamit District MJA hruaituten an tlawh. NH 44 (A) Dampui khaw hnuai leh Dapchhuah inkar ah hian KM 12 a thui chu Blacktop loh bakah lung pawh la phah loh lai te awmin hmun tam takah kopang leimin paih fai loh avangte in kawngtluan deuhthaw in kawng hi a diak nal nia thudawn a ni a. Mamit Sub-Hqrs. YMA President Vanlalchhuanga Chhangte chuan helai kawng siam that anih a, mipuite leh khualzin ten harsatna an tawh lohna turin Chief Minister hnenah kawng siamtha turin vawihnih thlen tawh mahse tun thlengin siamthat a la nih loh thu a sawi a. Helai kawng hi a rang lama siamtha turin thuneitute an phut thu sawiin, helai kawng siamthat anih theih nan theihtawp an chhuah zel dawn tih a sawi bawk.

ZPM Thalai in Chief Minister zawhna an zawt

ZPM Thalaite chuan nimin khan Aizawl Press Club-ah thuthar thehdarhtute kawmin Sept. 14-a sawrkar in thuchhuah siama Rosangzuala, Luangmual, tuna MNF Hqrs. Adviser ni mêk, OSD-a ruatna lehkha a rawn chhuak chuan mipuite a barakhaih hle tih an sawi a.  Hripui len lai, hripui avanga retheihna tawkte hnenah sawrkarin Mizoram budget atanga a hrana tanpuina pawh a sem loh laia OSD-a ruat  chawp chûk chûk tur khawp hian Rosangzuala hian eng thiamna leh  theihna chung chuâng bîk nge a neih? tih chu Chief Minister an zawhna a ni tih an sawi bawk.

Leng-a mibo ruang hmu

Inrinni kalta atanga Serchhip District chhung Leng khua a chin hriatloha bo Lalramngheta chu  nimin khan a ruang hmuh niin nimin vek khan vuiliam nghal a ni. Kum 34-a upa Lalramngheta (Patea tia hriat bawk) hi mahni-a khawsa niin kar kalta Inrinni, Sept. 11, 2021 atang khan a chin hriatloh in a awm a, Thawhlehni atang khan khawtlang huapa zawn niin nimin chawhma dar 11:00 vel khan Leng khaw hnuaia Mual kardan kawr-ah a ruang hmuh a ni a, nimin vek khan vuiliam nghal a ni. Thudawn danin Lalramngheta hi mahni chauha khawsa niin tunhnaiah taksa leh rilru lamah harsatna tawkin mahni pawhin a In-ah a hian a riak ngamlo fo a. A tlukna lamah insawh na in a boral nia rin a ni.