Latest News

Mizoram-ah Bank 24 awm mek

State Level Bankers’ Committee (SLBC) Mizoram thutkhawm chu nimin khan neih niin he huna tarlan a nih danin Mizoram-ah Bank chi hrang hrang 24 a awm mek.

Nimin-a State Level Bankers’ Committee (SLBC) thutkhawm hi hri leng avangin Video Conferencing hmangin neih a ni a, thutkhawm kaihruaitu Chief Secretary, Lalnunmawia Chuaungo chuan kum 2018-a Mizoram-a a rawn awm tirhin CD Ratio chu 40% vel a nihthu leh, tun June, 2021 quarter-ah 47 % a ni chu Bank-te hmasawnna leh hnathawh rah a ni tih sawiin, chak zawka hmasawnna a kal theihna turin hei aia sang CD Ratio nei turin Bank te chu a chah a. India sawrkar in Scheme chi hrang hrang a duante thahnem ngai taka mipuite chawikanna tur lam hawi zawnga hmalak uar thar turin a chah bawk. 

Chief Secretary chuan sumdawnna lamin State hmasawnna atan nasa takin a pui thei tih pawh sawiin, hei vang hian sumdawn tanna tura a ti àwm mite puih a pawimawh thu a sawi a, Loan duhte chu an dilna a tha tâwk em tih te uluk taka lo thlira, a tha turte chu pui zel turin a chah bawk.

He thutkhawm ah hian kum 2021-22 Financial Year-a Quarter hmasa ber, June 2021 Quarter chhunga Mizoram a Bank awmte leh Line department hrang hrangte hna thawh thlirlêt a ni a. He financial Year 2021-22 atana MzSRLM hnuaia NRLM Scheme leh UD&PA Department NULM hnuaia Self Employment Programme target duan te chu pawmpui a ni bawk.

He huna tarlan a nih danin Mizoram-ah Bank chi hrang hrang 24 awm mekin heng te hian Branch 220 an nei mek a, Public Sector Bank Branch 76, Private Sector Bank Branch 35, Regional Rural Bank Branch 89 leh Co-operative Bank Branch 20 te a ni. Heng Bank hrang hrangah hian kumin sawrkar kum a Quarter hmasa bera sum dahluh chu cheng vbc. 14243.22 niin Loan pekchhuah chu vbc. 6155 a ni thung a, CD Ratio chu 47.45% a ni.

Comments

Chhiar Hlawhte