Mizoram Secretariat (Main Building)-ah Portable Baggage Scanner bun a ni

Aizawl-a Mizoram Secretariat (Main Building) luhna pui ber (Gate No. 1)-a Portable Baggage Scanner (bungrua, ipte, etc. enfiahna khawl) chu hman theih turin Addl. Chief Secretary JC. Ramthanga chuan nimin khan a hawng.

Mizoram Police Headquarters hmalakna a lei Portable Baggage Scanner hawnna puala inkhawm tawi buatsaihah Addl. Chief Secretary chuan Home Department hmalakna a Mizoram-a Office pui ber a venhimna atana tangkai tak khawl thar hman a ni dawn ta chu lawmawm a tih thu a sawi a. Ram ralmuang a awm ni mah ila inralrinna thlahthlam erawh a fuh lo tih sawiin, Police Headquarter lam hotute leh thawktute hmalakna a fakawm a tih thu a sawi a, Mizoram Sawrkar hmun pawimawh hrang hrangah tha taka venhimna hna an thawh chu lawmawm a tih thu a sawi bawk.

Portable Baggage Scanner hi ‘Assistance to States for Modernization of Police Forces’ Scheme hnuaiah 2018-2019 atan 4 (pali) leh 2019-2020 atan 4 (pali) Central Sawrkar atanga hmuh a ni a. East India Consortium hnen atangin Portable Baggage Scanner (Model : Kritiscan 6040) 8 (pariat) lei a ni. Heng khawlte hi SP, Security kut a dah niin, anni hian a dahna hmun tur te buai puiin, MINECO Main Building nen hian Aizawl khawpui chhung a hmun pawimawh, Security tih that ngai zual hmun 6 (paruk)-ah dah a ni a. He Portable Baggage Scanner hmang hian Mizoram Secretariat Building-a lut leh chhuakte ip te, bungrua, leh thil dang dangte scan (enfiah) a ni dawn a. A chhungah engnge awm tih hawng kher lovin a hriat theih dawn a. A enkawl hna hi Secretariat venhimna thawk mektu Mizoram Police (Security) ten an kalpui dawn a ni.

Baggage Scanner khawl hi Vedant Technologies - Noida, UP te siam a ni a, Kritiscan 6040 hi Multi Energy X- Ray baggage scanner ang chi hi a ni a. Airport, Sawrkar office lian leh Metro-ah te hman a ni tlangpui a. Black and white leh Colour in a scan thei a, 20 screen image recall leh image 1,00,000 chuang a khawl thei a ni.