Hripui len loh hnuah pawh 'Educational Technology ala tangkai dawn - L. Thangmawia MLA

Mizoram sawrkar-a Human Resources Development (HRD) Board Vice Chairman L. Thangmawia chuan Educational Technology hman tangkai chu hripui len tawh loh hnuah pawh a tangkai dawn tih a sawi.

Human Resources Development (HRD) Board bultuma Middle School leh High School Science zirtirtuten hripui len laia Online hmanga naupang zirtirna atan Educational Technology hman tangkai dan inkawhhmuhna Webinar nizan hmasa a neih a hmanpuina ah he thu hi sawiin L. Thangmawia MLA chuan naupang zirtir nana Educational Technology hman tangkai chu hripui len tawh loh hnuah pawh blackboard hmanga zirna puitu atan a tangkai hle dawn tih a sawi a. Mizoram-a Science zirna chu kum 1973 hma lamah chuan tih tham a la awm lo tih sawiin, kum 1973 atangin Primary School leh Middle School-ah zir tan a ni a, kum 1986-ah Science & Technology Department a lo ding a, Department pawimawh tak a lo ni ta a. Hemi hnu hian Science zirna hian hma a sawn chho zel a, tunah chuan Mizoram University a lo awm ta a, Science zirna pawh a tha chho ta zel a ni a ti.

Zan hnih chhung Educational Technology hman tangkai zirna webinar chu Science Teacher-te fuih tharna leh inchher hriamna hun pawimawh tak a ni tih pawh sawiin HRD Board Vice Chairman chuan, Mizoram mil-a e-content siam te pawh tih theih a duh thu a sawi a, a siam thei ten an siam chu a siam ve thei lo tan tangkai taka hman theih a ni dawn tih a sawi bawk.

COVID-19 hri leng avanga zirna In te hawn mumal theih a nih loh avangin Human Resources Development hnuaiah hian Online Education Committee siam a ni a, he Committee hian Guidlines for Education during prevalence of Covid-19 Pandemic a siam chu sawrkarah pawh thehluh a ni a, a tihhlawhtlin nan zirtirtute kaihhruai dan tur sawihona (consultation) te neih a nih hnuah zirtirtute puih nan webinar hi buatsaih a ni ta a ni. Webinar-a tel zirtirtute hian mithiam ten an kaihhruaina leh technology hmanga zirtirna tur an kawhhmuhte chu hlawk leh tangkai an tih thu an sawi hlawm a ni.

Zan hnih awh zirtirtute tanpui nana Educational Technology zirhona Webinar hi HRD bultumin Directorate of School Education, Directorate of SCERT, Science Teachers Association of Mizoram (STAM) leh Mizoram IT Society te tangkawpin an buatsaih a ni a, Middle School leh High School Science zirtirtu 695 te chu nizan hmasa-a he webinar-ah hian an tel a, mithiam hrang hrang ten thupui thlan bik hrang hrang hmangin zirtirna an pe a ni.