Luidung nungchate tha zawk leh awmze nei zawka humhalh a nih theih nan thawhhona ziak

Mizoram chhunga luidung nungchate tha zawk leh awmze nei zawka humhalh a nih theihna turin Fisheries Department leh Central YMA te chuan nimin khan Thawhhona Thuthlung an ziak.

Fisheries Minister K. Lalrinliana Pisa-a thawhhona thuthlung ziahna hun hi Fisheries Secretary, Laldawngliana chuan kaihruaiin he hunah hian Fisheries Minister chuan kum tam tak chhung Zoram-a luidung hmung hrang hrangah YMA leh khawtlang ang pawhin humhalh hna hi Vawiin thlengin kalpui a ni tih sawiin, heng lui humhalh leh a chhunga chengte venhim hna thawk tur hian Fisheries Department-a thawk mi 188 te pawhin an phak tawkin an kalpui ve reng tih a sawi a. Amaherawhchu, venhim leh thildang atan Work Force mamawhna a nasa a, YMA te hi nungcha humhalhna kawngah nasa taka pawl anga hna lo thawk tawh an nih angin sawrkar chuan Thawhhona Thuthlung hi a ziahpui ta a ni, a ti. Minister chuan The Mizoram Fisheries (Amendment) Act, 2016; The Mizoram Fisheries Rules, 2019 leh The Fisheries Conservator Reward Scheme 2019 huamchhunga thawhhona chuan ram ei leh bar intodelh kawngah sulsutu a ni thei a, hun bi nei leh dan leh dun kalphung mumal taka luidung nungchate kan enkawl chuan mimal leh sawrkar pawhin a nei dawn a ni, a ti bawk.

He Thawhhona Thuthlung hi kum hnih (2) chhung atan niin, a tul anga pawhsei a ni ang a. He thuthlung hian behchhan pathum neiin, chungte chu- The Mizoram Fisheries (Amendment) Act, 2016; The Mizoram Fisheries Rules, 2019 leh The Fisheries Conservator Reward Scheme 2019 te a ni a. First Party-ah Fisheries Department aiawhin F. Vanlallawma, Director, Department of Fisheries leh Second Party-ah Central YMA aiawhin Vanlalruata, President, Central YMA ten an ziak a, hriatpuitu-ah Laltleipuii, Jt. Director, Department of Fisheries, Prof. Lalnuntluanga, General Secretary, Central YMA ten an ziak bawk a ni.

Thawhhona Thuthlung a inziak angin luidung nungchate man theihna pekchhuah chungchang ah YMA leh Fisheries Department te a tul angin inbiakrawn thin a ni anga, dan lova luidung nungcha mantu te manchhuah kawngah YMA in Department a pui thin ang a, luidung humhalh tha ten YMA hriatpuina thil telin Department-ah lawmman an dil thei ang a, luidung humhalh thate inelna Branch Level-ah YMA in a buatsaih thin dawn a ni.