Lok Sabha MP in Coal & Mine Ministry nawr

Mizoram Lok Sabha MP, C. Lalrosanga chuan Mizoram leilung hausakna dapchhuah hna thawk chak turin Coal & Mines Ministry chu a nawr.

Mizoram Lok Sabha MP hian nimin khan New Delhi-a Parliamentary Standing Committee thutkhawm ah thu sawiin Mizoram leilung hausakna dapchhuah hna thawk chak turin Coal & Mines Ministry a nawr a. Tun kum 5 kalta chhunga Mizoram tiamin hmarchhak State 5-a leilung hausakna dapchhuah belh a ni lo chu a ngaihmawh thu sawiin, hmarchhak State-te zingah intluktlang takin leilung hausakna dapchhuah hna thawh a ngai a, State thenkhata hmalak tlem bik chu a dik lo tih a sawi bawk. Geological Survey of India (GSI) hotuten Mizoram leh State thenkhatah ILP dan leh Sixth Schedule Dan te hman a nih avanga an hnathawk ten harsatna an tawk nia an sawi chungchangah Lok Sabha MP chuan hmasawnna hna thawktuten chutiang harsatna an tawh a rin loh thu a sawi a, thuneitute nen indawrfel theih vek a nih thu Parliamentary Committee chu a hrilh a ni.

Hmarchhak bial State 8-a leilung hausakna haichhuah leh hmasawnna kaihhnawih thil sawihona hi Parliamentary Standing Committee on Coal and Steel Chairman MP (LS), Rakesh Singh-in a kaihruai a. Hmarchhak MP-te tiamin MP thahnem tak leh Mining Ministry hotute bakah GSI hotute an tel a ni.