Assembly thutkhawm neih tan a niAssembly thutkhawm neih tan a ni

Adviser to CM-ah thla tin cheng nuai 6 chuang seng

Ni thum chhung awh tur Mizoram Legislative Assembly pariatna, thutkhawm vawi 8-na chu nimin khan neih tan a ni a, Chief Minister Adviser pahnih leh an Staff-te hlawh leh enkawl nan thla tin Rs. 6,51,393/- sen thin a nih thu nimin-a zawhna leh chhanna hunah tarlan a ni.

Nimin-a Mizoram Legislative Assembly thutkhawm hi chawhma dar 10:30-ah tan niin kumin August ni 17, zing dar 6:35-a kum 44 mi ni-a boral Tuirial bialtu MLA, Andrew H. Thangliana leh kumin April ni 24, tlai dar 5:20-a kum 65 mi ni-a COVID-19 vanga boral Minister hlui, PC. Zoram Sangliana te sunna hun hman a ni a, anmahni sun nan member-te chu ngawi rengin Minute khat chhung an ding a. Heng hruaitu hlui pahnihte sunna ah hian House Leader, Zoramthanga tiamin Member 6-in thu an sawi a, hruaitu zahawm tak tak boralta te chu an ui thu leh an kalsan an chhungte Pathian in awmpui se an duh tih an sawi hlawm a ni.

Hruaitu hlui sunna hun hman zawh a nih hian zawhna leh chhanna hun hman nghal a ni a, zawhna leh chhanna hunah Personnel and Administrative Reforms changtu Deputy Chief Minister, Tawnluia chuan Chief Minister Adviser pahnih leh an Staff-te hlawh leh enkawl nan thla tin Rs. 6,51,393/- sen thin a ni tih Aizawl West-III bialtu MLA, VL. Zaithanzama zawhna chhangin a sawi a. Deputy Chief Minister chuan Chief Minister hian Adviser pahnih, C. Lalramzauva, Senior Advocate leh K. Lalsawmvela, PWD Engineer-in Chief hlui a nei mek tih tarlangin, Chief Minister Adviser-te hi Chief Minister hnena thurawn petu an ni a, chumi rual chuan Chief Minister-in tih tur leh bawhzui tur a pek apiang an thawkin an bawhzui thin a ni, a ti.

Tawnluia chuan, Chief Minister Adviser te hi Mizoram Sawrkar-a Minister of State-te nen dinhmun inang tlanga dah an ni tih sawiin, anmahni leh an Staff-te hlawh leh enkawl nan thla tin Rs. 6,51,393/- sen thin a nih piah lamah GAD Vehicle Outsourcing Policy angin thla khatah Rs. 35,000/- sengin lirthei pakhat ve ve hman tir an ni a, GAD (Secretariat Administration Wing) atangin lirthei pakhat ve ve pek an ni bawk a. Chumi piah lamah chuan Kawlphepha, Tui leh Telephone bill pek sak an ni thin bawk tih Deputy Chief Minister chuan a sawi bawk.