Department inenkawlna leh kawlphetha leina thawhchhuah nan kawlphetha hman man tihsan a ni

Power and Electricity Minister, R. Lalzirliana chuan kawlphetha hman man tihsan a nih chhan chu Department enkawlna tur leh kawlphetha leina tur sum thawh chhuah vena tura ruahman a ni tih House hrilhin, leiba a tam avangin BPL te kawlphetha hman man a thlawna pek a nih chuan an talbuai palh ang tih a hlauhawm tih a sawi bawk.

Nimin-a Assembly Session chhunzawm ah P&E Department changtu Minister R. Lalzirliana chuan kawlphetha hman man tihsan a nih chhan sawiin, Department hlawh leh sum hmanral zawng zawng phuhru thei tur berin tuna rate thar chu siam a ni tih a sawi a, sawrkar in zaa 41.92 a tihsan a tum dan a nih thu leh, Bill tihsan a lo nih chuan thawktute hlawh inenkawlna tur alo phuhru ve thei dawn tih sawiin, Power an leina ah sawrkar pawisa tibuai lo zawnga kal an tum tih a sawi a, Meter Reading laksual palh emaw, Bill siamsual palh avanga Bill sang zual ni a hriatte chu a theih anga endika siamthat ngaite siam zel a nih thu a sawi bawk.

ZPM Legislature Party Leader Lalduhoma zawhna kal zela zawh belhna te chhangin P&E Minister R. Lalzirliana chuan, Power lei nan thla tin cheng vbc. 31-35 inkar sen ral thin a nih thu sawiin, mipui hnena Bill an siam atang erawhin a zat ve dawn bak dawn an nei lo tih a sawi a, sawrkar Department Office hrang hranga Electric Bill te chu dawn leh loh turte a awm bawk tih leh Power lei nana sum an hmanral tam ngaih-tuahin an hmuhlet erawh a tlem thu a sawi a, hemi avang hian Power leina sum tam tak bat a ngaih phah thin a, Power leina sum sawrkar sum bawm dang atanga lak a nih tawh loh nan leh thawktute hlawh turte a lo phuhruk theih nan Department-in Electric Bill tihsan chu a rawt ta tih a sawi.

P&E Minister chuan leiba a tam avangin BPL te kawlphetha hman man a thlawna pek a nih chuan an talbuai palh ang tih a hlauhawm tih pawh sawiin, hri len hnuah Sawkar laipuiin cheng vbc. 7 an pek hmangin BLP chhungkuate man tlawm zawka Bill siam sak an nih thu leh BLP hnuai te chu a tlawna pek tam tak an awm tih a sawi bawk.