Aizawl khawpui chhunga hri leng do dan tur AMC leh Local Council aiawhte nen sawiho a ni

Aizawl Municipal Corporation (AMC) Councillor te leh Aizawl City Area Local Council hotuten nimin khan Health Minister hovin COVID-19 laka Aizawl khawpui a him theihna tura hmalakho dan tur an sawiho.

Health Minister Pisa-a he sawihona hunah hian Dr. R. Lalthangliana chuan COVID-19 hri vei mek (active case) kan neih zinga 60% chu Aizawl khawpui chhung ami te an ni tih sawiin, Aizawl khawpui enkawl tura mipuiten an thlanchhuah Councillor te leh Local Council hotute nen hmalak dan chungchang leh a kaihhnawih thil pawimawh an sawiho chu a tul hle tih a sawi a. Hripui a len tirh atanga hah pawh sawi lova theihtawp chhuaha hma an lakna ah lawmthu sawiin, an bial chhung bakah bial pawn thlenga an luangchhuak thinte leh sawrkar hmalakna tha taka an thlawp thin avangin lawmthu a hrilh a. COVID-19 chungchanga thutlukna pawimawh siam a nih dawn reng rengin zau taka inrawnkhawmna neih a ni thin tih pawh sawiin, tlawmngai pawlte, Kohhran hruaitute leh Medical Expert te bakah Official pawimawh te nen zau taka sawiho a nih hnua thutlukna siam thin a nih thu a sawi bawk.

He hunah hian AMC Councillor te chuan an bial dinhmunte an sawi bakah COVID-19 dona kawnga an hmalakna te leh harsatna awm thei nia an hriat te bakah rawtna chi hrang hrang an sawi a, vaccine la thei zawng zawng ten an lak kim vek a pawimawh thu uar takin an sawi a, mipuite zirtir kawngah theihtawp an chhuah dawn tih an sawi bawk. An bial chhung dinhmun an thlirin hri inkaichhawnna tam ber chu thenawm khawveng leh chhungkhat laina inlenpawh atangin a ni tih an sawi a, hemi kawngah hian mipuiten mawhphurhna an neihte uar zawka inzirtir a tul tih an sawi bawk.

Aizawl District Bawrhsap pawhin Red Zone puan dan kalhmangte bakah 4C inenkawlna chungchangte leh Frontline workers COVID-19 hri kai nunna chante tana Mizoram sawrkarin zangnadawmna a siam dil dan turte a sawi a, AMC hotute chuan zangnadawmna hi tun thla (September) ni 30 thlenga hman tur a nih laiin hrilengin ziaawm lam a pan theih si loh avangin a hun hi pawhsei nise an duh thu an sawi a ni.

Nimin a he sawihona hun hi Medical Operational Team Chairman Dr. ZR. Thiamsanga, MLA, Aizawl Bawrhsap Dr. Lalhriatzuali Ralte, AMC Jt. Commissioner leh Health Department Official te pawhin an hmanpui a ni.