Chanchin thar thenkhat :

Hri leng mek sawihona nei

Mizoram-a COVID-19 hri leng mek chung-changah nimin khan Health Minister Dr. R. Lal-thangliana hovin a Pisa-ah Public Health Experts Doctor ten inkawmna an nei. He inkawmna ah hian Public Health Experts te hian COVID-19 Third wave lo thleng thei chungchanga mipuite inzirtirna tur leh chetlak dan tur tha nia an hriat te an sawi a, COVID-19 dona kawnga sawrkar hmalak mek dan chungchangah an ngaihdante leh tul nia an hriatte an sawi bawk a, WHO kaih-hruaia Meeting an neih ah Mizoram hmalak dan chu tha thawkhat a ni tih an sawi thu leh State dangte pawhin entawn ve se tih an neih thu an lo sawi chhuak tihte sawilan a ni bawk. He inrawn-khawmnaah hian Restricted Area/Red Zone leh Micro Containment Area puan dan leh puan chhunga hmalak dante sawiho a rawtna hrang hrangte ngaihthlak a ni a, 4C kalpui dan chungchangte, Home Isolation leh Sample Test kalphung atana rawtna chi hrang hrangte sawiho a ni bawk.

Best Farmer Award dawng

Indian Institute of Horticultural Research, Bengaluru, Karnataka in kuthnathawk titha te hnena Award a hlan tur zingah Vanlalkunga, Lengte, Mamit District chu ‘Best Farmer Award’ dawng tura thlan niin Indian Institute of Horticultural Research, Bengaluru in nimin, Sept. 7, 2021-a an din champhaphak vawi 55-na, Institute Foundation Day an lawmna ah he Award hi semchhuah a ni. Vanlalkunga hian Tomato Aariety Arka Samrat leh Arka Abhed hlawtling taka a thar avanga Award dawng a ni a, heng Variety te hi IIHR Released Variety an ni.

Sathau in apple luan thin

Food and Drug Administration Wing, Health Department chuan tunhnaia State pawn atanga Apple lakluh tam tak chu Sathau (wax) a luan a ni tih hmuhchhuah a ni tih an sawi a. Hei vang hian Apple chu a kawr nena ei a nih dawn chuan tui sa nena silfai thin tur a nih thu leh a nih loh chuan a kawr vel tur a nih thu an sawi bawk.

Tualthattu chhui zui mek

Nizan hmasa a Lunglei Chanmari Veng-a K. Vanlalduati (52) thattu chu Police ten manchhuah ngei tumin an zawng mek. Lunglei Chanmari-a Maxi Cab Counter nghaktu K. Vanlalduati thihna chungchangah hian Lunglei Police te chuan tual-thah thubuai ziaklutin vanduaina tawk K. Valalduati’n Dawr a nghahna hmuna bag a ah thin chu nimin zing khan Lunglei Farm Veng-ah chhar niin bag ah hian pawisa leh a lehkha pawimawh te hmuh a ni bawk. MHIP Sub-Hqrs. Lunglei chuan he pawikhawihna thleng hi an dem thu sawiin, tual-thattu man ngei an phut thu leh hremna pek an duh thu an sawi a. Misual zawnchhuah kawngah pawh mipui ten Police te tawiawm turin an ngen bawk. Vanduaina tawk K. Vanlalduati hi a ruang Postmortem a nih hnuah nimin khan vuiliam a ni.

RD Minister in hnathawh en

Rural Development Department changtu Minister Lalruatkima chuan nimin khan Aibawk a Rural Mini Sports Complex chu a hmunah tlawhin Aibawk khawtlang hruaitute leh Department hotute nen hmalak tawh chin leh tuna a dinhmun te an sawiho a. Aibawk Mini Sports Complex hi NLCPR hnuaia khelmual project 4 zinga pakhat niin kum 2019 khan hmalakna bul tan a ni a. He project atana sum ruahman nuai 413-ah nuai 13 chu DoNER Ministry in lo cut in nuai 400 sanction-ah first installment atan nuai 180 hmuh a ni tawh a. Kum hnih chhunga thawh zawh tura ruahman niin PWD Engineer te enpuina hnuaiah NECS in he hna hi an thawk a, tunah hian Project hna 80-90% vel thawh zawh tawh a ni.

VC House sak tum mek

Local Administration Department Minister K. Lalrinliana chuan khaw hrang hrangah VC House sak tum mek a ni, a ti. Nimin a Assembly inkhawm ah LAD Minister chuan VC House chu Ministry of Panchayati Raj hnuaia Rashtriya Gram Swaraj Abhiyan (RGSA) Scheme-ah sa zel tura rawtna siam thin a ni tih sawiin, Financial year 2020-21 chhung atan sawrkar laipuiin VC House thar 136 leh thawmthat  ngai 96 te chu siam tum a ni a,  Financial Year 2020-21 atana Fund chu Central in an pek tlai avangin tunah hian VC House thar 136 leh thawmthat ngai 96 te chu tan tura hmalak mek a ni, a ti.