Damdawi In a pangngai in kalpui chhunzawm a ni

Serchhip District Hospital-a damlo awm-puitu zingah hri kai hmuhchhuah ni mah se mipui ten harsatna an tawh loh nan damlo inentir leh Casualty te chu a mamawhte tan pan theih reng a ni.

Serchhip District Medical Superintendent Dr. ZD. Lalmuanawma chuan Serchhip District Hospital-a damlo leh anmahni awmpuitu tur te chu an luh hmaa Covid test neih zel a ni chungin ni-minpiah khan damlo awmpuitu mi pakhat chuan insawiselna a neih avanga Sample enfiah a nih hnuah COVID-19 hri a kai tih hmuhchhuah a nih thu leh hei vang hian Mipa leh Hmeichhe Ward a damlo leh a awmpuitu mi 29 te chu an Sample enfiah sakin hri kai mi 2 hmuh leh an nih thu a sawi a. Nimin khan thawktute pawh Sample enfiah sak leh an ni bawk.

Serchhip District Hospital-a damlo awmpuitu hri kai te hi CCC-ah dahluh nghal niin an dinhmun ngaihtuahawm a ni lo nia thudawn a ni a, Serchhip District Medical Superintendent chuan nimin atang khan Serchhip District Hospital-a Male Ward leh Female Ward te hi ni 7 chhung lockdown a nih thu leh damlo admit belh leh a awmsa chhuahtir te pawh phal a ni lo tih sawiin, hei bakah hian damlo kan leh mamawh in pek pawh thawktute phalna la hmasa lo chuan phal ni lovin Covid Appropriate Behavior pawh uluk zawka kenkawh tura tih a ni bawk a. Damlo leh a awmpuitu chaw pe duh te chuan zing lamah dar 8:00 leh 8:30 inkar leh tlai lamah dar 5:00 leh 5:30 inkar ah damlo hming leh Ward bakah khum number te ziakin Casualty Gate bulah dah tur a ni.

Serchhip District Hospital-a awm zingah hri kai hmuhchhuah ni mah se damdawi In chu dan pangngaia kalpui reng niin OPD leh Casualty pawh a mamawhte tan pan theih reng a ni a. Damlo tana thisen pek pawh dan pangngaia kalpui reng tur niin amaherawh chu heng ah hian CAB tha taka zawm tur a nih thu District Medical Superintendent chuan a sawi bawk.