Latest News

Cricket Final khel dawn

Cricket Association of Serchhip District in an buatsaih, Serchhip District Cricket League vawi khatna chu Vawiin chhun dar 12:00 hian Final khelh a ni dawn ta a, Tuikhuah Veng CC leh AO3C ten Final hi an khel dawn a ni. He inkhel hi TV lamah en theih tura pekchhuah leh a ni dawn a ni. Vawiin a Final khelh hi Cricket Association of Mizoram hotute pawhin an rawn hmanpui dawn a ni.

SBM (G) bultumin Serchhip-ah Faina beihpui thlakna hawngin Faina hnatlangpui neih nghal a ni

India ramin Zalenna a hmun kum 75-na lawmna, 'Azadi Ka Amrit Mahotsav' kal zelah nimin khan Swachh Bharat Mission (Grameen) Serchhip District bultumin Faina beihpui thlakna, 'Swachhata Hi Seva' hawnna neih niin Faina hnatlangpui 'Swachhata Shramdaan' kalpui tan a ni bawk.

'Swachhata Hi Seva' hawnna PHE Serchhip Office tual-a neih ah beihpui thlakna hawngtu MJA Serchhip District President Kapliana Pachuau chuan COVID-19 hri leng karah faina kawnga hmalakna kalpui zel a tul thu sawiin, COVID-19 hri laka himna atan pawh faina ngaih pawimawh a tul tih a sawi a. Faina kawnga mipuite hmalakna chuan India chu khawvel ram ropui zingah a siam mek tih sawiin, faina kawnga theihtawpa hma la zel turin kalkhawmte a sawm nghal a. Kum zabi 20 hnu lamah ram hruaitu ten khawvel-a Democracy ram lian ber ni si heti em em a kan hnufual chhan an chhuina atanga an hmuhchhuah chu ‘Kan fai loh vang a ni’ tih a nih thu sawiin, hei vang hian Faina kawngah nasa taka hma la in kan fai chuan kan lo hrisel a, khawtlang nun a lo hlim a, ramin hma a sawn dawn tih a sawi bawk.

Faina Beihpui thlak hawnna hunah hian SBM-a District Coordinator Samuel Lallawmzuala chuan he beihpui thlakna kawnga an hmalakna te tarlangin, Faina Beihpui chu hlawm thuma kalpui tur niin a vawi khatna, a hawnni hian Faina hnatlang neih tur anih angin PHED Office a thawkte leh Govt. Serchhip College naupangte chuan hnatlangin khawlai a bawlhhlawh an thianfai a, a vawi hnihna ah Sept. 17, 2021-ah Serchhip District SBM (G) hnuaia enkawl khaw 37 ten WATSAN Committee kaihhruaina hnuaia hnatlang neiin vantlang hmun pawimawh lai te tihfai a nih dawn thu leh Plastic hman tlem inzirtirna neiin, Plastic hnawmhnawk te chharin Plastic Waste Collection Centre-ah paih a nih tur thu a sawi a. A vawi thumna Sept. 20-ah ODF Plus Target Village, E. Lungdar Block hnuaia khaw 11-ah Awareness Campaign buatsaihin E. Lungdar, Lungkawlh, Leng, Sailulak, Chekawn, Mualcheng, Khaw-lailung, Piler, Sialsir, Baktawng leh Lungchhuan khua te chu ODF Plus-a puang tura hmalak leh a nih dawn thu a sawi bawk.

Hei bakah hian he hmalakna hnuaiah hian 100 Days Campaign pawh August 15, 2021 atanga kalpui a nih thu sawiin, he Campaign hnuaiah hian School, Anganwadi, VC House adt. ah te Tui Connection pek vek tum anih thu te, Inthiarna a tam thei ang ber sak tum anih thu te leh ODF Plus leh ODF te a ngai reng a vawn nun zel anih theihna tura inzirtirna neih anih thu a sawi bawk.

Nimin-a 'Swachhata Hi Seva' hawnna hun hi PHE Serchhip WATSAN Division-a Sr. EE, Er. F. Lalsanglura chuan kaihruaiin he hun hman zawh a nih hnu hian Govt. Serchhip College zirlai naupang Faina hnatlangpui, 'Swachhata Shram-daan' nei turte chu PHE Serchhip Office atangin a vailiam nghal a. He hnatlang-a thawk te hian kawngpui dung-a bawlhhlawh te chharfaiin a paihna tur hmunah paihin New Serchhip College Peng thleng an kal a. He hnatlang-a thawk te hian Faina chungchang inzirtirna thuziak an keng bawk a ni.

Comments

Chhiar Hlawhte