Latest News

Chanchin thar thenkhat :

Lok Sabha MP in sawipui

Mizoram Lok Sabha MP C. Lalrosanga chuan nimin khan New Delhi-ah Union Home Secretary (Border Management) Sanjeeva Kumar leh Additional Home Secretary (North East) Piyush Goyal te hmuin tunhnaia Myanmar atanga Mizorama raltlante chungchang a sawipui a. He hunah hian Lok Sabha MP chuan kumin kumtir atanga Myanmar ram buai avanga rawn tlanlutte enkawlna leh chhawmdawlna ngaihtuahpui tur leh sum leh pai bakah damdawi leh mamawh dangte tiamin tanpuina awm thei ang ang ngaih-tuah sak turin a ngen a ni.

Hei bakah hian Mizoram leh Assam ramri buai chungchang pawh Home Ministry hotute chu sawipuiin, a chinfelna atan chak taka hma la tur leh theihtawp chhuahpui turin a ngen a, Ramri hrul hmunte tihmasawn tura hmalak chak a tul thu pawh sawiin, sum tam zawk leh ngaihtuahna tam zawk seng turin a ngen a ni. Lok Sabha MP chuan Mizorama State Police Service Officer-te All India Service-a an kaisanna tur tihkhawtlai nia a hriat thu pawh sawiin, lo enfel rang turin Union Secretary-te chu a nawr nghal bawk.


Hri leng thlirhona nei

Health Minister Dr. R. Lalthangliana hovin nimin khan SAD Conference Hall-ah COVID-19 hri leng mek chungchang thlirhona neih a ni a, he hunah hian ZMC-a Covid-19 vei enkawlna Ward 8 te chu khat deuh reng mah se harsatna lian an tawh loh thu leh ICU erawh a khat hneh hle tih tarlan a ni a. Zirchianna an neih ah ZMC-a COVID-19 vanga nunna chan zinga 55% chu kum 60 chunglam niin, kum 18 - 44 chu 23% leh kum 45 - 60 chu 20% an ni a. Nunna chan zinga 66 % hi mipa niin Aizawl khawpuia cheng chu 71.60% an ni bawk. ZMC-a COVID-19 hri kai boralte hi chawhrualin ni 11.65 damdawi In a enkawl ang an ni a, an zinga 80% chu natna ben-vawn nei niin 76% chu positive an ni tih hriat-chhuah atanga ni 5 chhunga admit an ni a, 55% chu positive an ni tih hriatchhuah ni la la a admit an ni.


Nurse chawimawina dawng

India ram chhunga Nurse hna-thawk tha bikte hnenah hlan thin  ‘National Florence Nightingale Awards 2020’ chu nimin khan ramchhunga Nurse 51 te hnenah India President in a hlan a. Mizoram atang pawhin C. Dengthang-puii, Health Supervisor (Rtd) Bungkawn Vengthar Aizawl leh Vanlalthuami, Health Worker, Theiriat Sub- Centre, Lunglei te hnenah Award hi hlan niin Award hian thuziak leh sumfai Rs. 50,000/- a keng tel a. Mizoram atangin he Award hi mi 11 in lo dawng tawh a vaiin mi 13 in an dawng ta a ni.


Oxygen Concentrator vailiam

ICICI Bank Ltd. in COVID-19 hripui leng avanga Oxygen mamawhna a san zia hriaa Corporate Social Responsibility (CSR) kaltlanga Directorate of Health Services-a Oxygen Concentrator 33 an pek te chu nimin khan District hrang hranga Primary Health Centre (PHC) leh Community Health Centre (CHC) 14 hnena pek turin Chief Minister Zoramthanga chuan a vailiam.

Comments

Popular News (Last 30 Days)