COVID-19 hri kai thar 444 leh dam 415 awm belh

Pathianni khan Mizoram-ah Sample 2050 enfiah niin heng atang hian COVID-19 hri kai mi 444 hmuhchhuah an ni a, hri kai hmuhchhuah hi tlem mah se Sample enfiah atanga chhut chuan za zela 21.66 zetin hri an kai a ni.

Pathianni khan ZMC-a RT-PCR Laboratory-ah Sample enfiah awm lovin (FIA) Test hmangin Aizawl-ah Sample 56 Test a ni a, heng atang hian hri kai mi 19 hmuhchhuah an ni a, an zinga mi pakhat tih loh chu Aizawl khawpui chhung ami vek niin hri kaina chhui ngai an ni.

District hrang hranga TrueNat Laboratory 11 zinga pathum-ah Sample 172 enfiah niin heng atang hian hri kai mi 9 hmuh an ni a, an vai hian Mamit District-a Sample enfiah vek niin khaw hrang hrang panga te atanga hri kai hmuhchhuah an ni bawk.

Rapid Antigen Test hmanga Sample enfiah 1822 atangin hri kai 416 hmuhchhuah an ni bawk a, an zinga 325 te chu Aizawl District-a hri kai hmuhchhuah te niin Bethlehem Vengthlang-ah hri kai 26 zet hmuh leh niin Chawnpui-ah 25 hmuh an ni bawk a, a bak hi Veng leh khua 65 ami an ni. Mamit District-ah hri kai 43 hmuhchhuah niin an zinga 31 te chu Luimawi khua mi an ni a, Lunglei District-ah hri kai 26 hmuhchhuah ni bawkin Siaha District-ah 8, Serchhip District-ah 5, Lawngtlai District-ah 4 Kolasib leh Khawzawl District-ah 2 ve ve leh Saitual District-ah hri kai mi pakhat hmuhchhuah an ni.

Mizoram-a COVID-19 hri kai hmuhchhuah belh an nih lai hian hri kai enkawl dam pawh awm belh ve zelin nimin khan tlai dar 5:00 thlengin mi 415 te enkawl dam niin anmahni enkawlna hmun atanga chhuahtir an ni a. Heti hian nimin tlai dar 5:00 thleng khan Mizoram-a hri kai hmuhchhuah chu 64,228 niin an zinga 53,881 te chu enkawl dam an ni tawh a, hei hi hri kai hmuhchhuah atanga chhutin za zela 83.89 niin tunah hian hri kai enkawllai 10,122 an awm mek a ni.

Nimin khan Mizoram-ah COVID-19 vangin mi pahnih an boral ve leh a, nimin zing dar 2:35 khan Hranga Kawlni (79), Mualcheng chu ZMC-ah boralin nimin vek tlai dar 4:30 khan Vanlalsiammawia (62), Hnahthial Kanan Veng chu ZMC-ah a boral ve leh bawk a. Heti hian nimin tlai dar 5:00 thleng khan Mizoram-a hri kai zingah mi 225 an boral tawh a ni.