Latest News

Chanchin thar thenkhat :

Assembly building-ah Baggage Scanner dah thar a ni

Home Department hmalakna-in State Legislative Assembly Main building leh Annexe-ah te Ipkhai entlangna khawl, Baggage Scanner dah niin nimin khan Mizoram Legislative Assembly Commissioner & Secretary H. Lalrin-awma chuan a hawng a ni. Assembly Commissioner & Secretary chuan State Legislative Assembly building chu sawrkar hmun pawimawh a nih dan te sawiin, uluk taka venhim ngai hmun pawimawh a ni tih a sawi a. Vawiin atanga Assembly Session neih tura hman theih tura Home Department-in hma an la chu lawmawm a tih thu a sawi bawk.


Best Citizens of India Award

The International Publishing House chuan Dr. ZR Thiamsanga MLA chu ‘Best Citizens of India Award 2021’ an hlan He Award hlantu International Publishing House te chuan Dr. ZR Thiamsanga, Best Citizens of India Award an hlan chhan chawimawina thuziak-a an ziak dan chuan Medical Doctor hna thawka thingtlang khaw hrang hrang a awmnaah theihtawp chhuaha midang tana a hun a hman vang te, hmeichhe lam Doctor ni mah se ama zirbingna lam ni lo natna dang vei leh tuar pawh midang nunchhan nan hlawhtling taka a zai thin vang te, hmun kilkhawr zawk a awm Doctor rawn ve phalo tan Health Awareness Campaign hlawh tling taka a neih thin vang te, MLA a thlantlin a nih hnuah pawh midang tana hna a thawhleh inpekna thuk tak chu a la chhunzawm zel a vang te niin an ziak a ni.


Counter nghaktu vithlum

Nizan dar 5:30 leh dar 6:00 inkar vel khan Lunglei Chanmari-a Maxi Cab Counter nghaktu K. Vanlalduati (52), Lunglei Chanmari-II ami chu mipa pakhat in a Counter-ah luhchilhin Chemte in a vit a, a hliam tuar lovin a boral zui a ni. He pawi khawihtu hi mi thenkhat ten hmuin a tlanchhe nghal a, Police te chuan chhui zui hna an thawk mek a ni.


Thawhhona tur ziak thar

Mizoram sawrkar hnuaia Mizoram Youth Commission (MYC) leh Serampore College, Kol-kata, West Bengal-te chuan thalaite chawikanna tur kawngah thawhhona tur thuthlung chu nimin khan an ziak a, he thuthlung-ah hian MYC aiawhin Dr. Vanlaltanpuia, Chairman chuan hming a ziah bakah Serampore College aiawhin Dr. Vansang-lura, Principal & CEO, Serampore College in a ziak bawk a ni. Serampore College hian khawvel hmun hrang hrangah thawhpui an neihte chu Mizo thalaiten hlawk taka an hman theihna turin he thawh-hona thuthlung hmang hian hmalak tum a ni.


Health Deparment-ah hlan

Confederation of Indian Industry (CII) chuan COVID-19 hripui laka mi tam zawkin hri danna (vaccine) an lak theih nan an project pakhat, Project Vaccine Nation atangin nimin khan Mizoram Sawrkar-ah COVID-19 vaccine dose 1000 an pe a, hripui tuartu HIV positive chhungkaw 300 chuang tan nutrition an pe tel bawk a, heng te hi Mizoram sawrkar aiawhin Health Secretary, Lalramnghaka chuan a dawng a ni. CII hi kum 1895-ah India ramah ding tanin India ram pumpui a Industry lian leh ropui tak tak te inzawmkhawmna pawl a ni.


Ram zalenna kum 75-na pualin Photo Exhibition

Information & Public Relations Department-in India ram in zalenna a hmuh kum 75-na puala Photo Exhibition a buatsaih, ‘Azadi Ka Amrit Mahotsav Photo Exhibition on Freedom Fighter’ chu nimin khan I&PR Director, Lallianpuii chuan Aizawl Art Gallery-ah a hawng a. Ni 5 chhung awh tur he Exhibition-ah hian Zalenna sualtu mi huaisente zinga mi India Hnam Pa Mahatma Gandhi thlalak 16, Subhash Chandra Bose thlalak 10 leh Sardar Vallabhbhai Patel thlalak 13, a vaiin thlalak 39 phochhuah niin, heng thlalakte hi hlu tak tak leh awmze nei tak tak vek an ni tih sawrkar thuchhuah chuan a tarlang.

Comments

Popular News (Last 30 Days)