Latest News

Central Sawrkar leh NEC Project te thlirho a ni

Ministry of DoNER, NEC, NESIDS, Special Assistance to States for Capital Expenditure (SASCE) hnuaia Mizoram-a Project hrang hrang 77 kalpui mek te thlirhona chu nimin khan neih a ni.

SAD Conference Hall-a he thlirhona hi Chief Secretary Lalnunmawia Chuaungo leh Addl. Chief Secretary JC. Ramthanga te hova neih niin Chief Secretary chuan Central Sawrkar in sum a thawh Project kalpui mek te chu a hun taka zawhfel a pawimawh thu a sawi a, “A hun taka kan zawh chuan a leh pekah pawh a Funding Agency atangin Project dil a awlsam thin,” a ti a. Department te chu project reng reng uluk taka vil a, harsatna awm te leh an chinfel theih loh thil a awm a ni chuan chungte chu ngawih bo pui mai lova hotulu sang zawkah leh ama hnenah pawh rang taka thlen vat thin turin a chah a ni.

He Meeting-ah hian Planning & Programme Implementation Secretary Lalmalsawma Pachuau chuan project hrang hrang te dinhmun tarlangin a dinhmun te inhrilhfiah a ni a. NLCPR hnuaiah Project 21; NESIDS hnuaiah Project 5; NEC hnuaiah Project 27 leh SASCE hnuaiah Project 24 thawh mek niin tun thla thum kalta ah khan NLCPR hnuaia Project 4, NEC hnuaia 5 leh SASCE hnuaia 4 te chu zawhfel a ni tawh a. North East Space Application Centre nena inthlunzawma project te vil dan tur ruahmanna kalpui mek pawh meeting ah tarlan a ni bawk.

Comments

Chhiar Hlawhte