Latest News

Cancer hemna khawl thar Chief Minister in a hawng

Mizoram State Cancer Institute (MSCI), Zemabawk-ah Cancer hemna khawl lian, Truebeam Liner Accelerator (LINAC) chu nimin khan Chief Minister Zoramthanga chuan a hawng.

LINAC hawnna ah hian Chief Minister chuan Cancer tamna State-ah Cancer veite enkawlna tur khawl tha dangdai tak, tunlaiah chuan a changkang berte zing ami hman theiha hawn a ni ta chu lawmawm a tih thu sawiin, Vengchhung mipui leh Aizawl khawpui chauh ni lo, State pum leh thenawm State-te tan pawh tangkai tak a nih tur thu a sawi a. Cancer enkawlna leh mipui hriselna chu sawrkarin a ngaihpawimawh thu leh inenkawlna tihchangtlun leh tihhmasawnna atan chuan neih ang ang hman zel a nih thu a sawi bawk.

Health & Family Welfare Minister Dr. R. Lalthangliana pawhin khawl changkang tak leh State in a mamawh tak hawn a ni chu lawmawm a tih thu sawiin, a mamawhtuten tangkai taka an hman a duhsak thu a sawi a. Cancer veite enkawlna tura State hmalakna hrang hrang lo awm tawh leh awm mekte sawiin, chung zingah chuan JICA nen thawhhona thuthlung ziah hnua a cheng vbc. 500 hmanga Cancer Super Specialty Hospital din tura hmalakna pawh tluang taka a kal zel thu a sawi bawk.

Nimin-a hawn tak TrueBeam LINAC khawl hi a lei leh chah thlenna mai bakah a dahna tur In/bunker (a bika sak ngai) leh a ken tel hrang hrang te nen hian a vaiin cheng vbc. 22 chuang man a ni a. Phai lam atanga company mithiam te chah a ngaih avangin COVID-19 hrileng avangin duh anga chaka hmalak theih a ni lova, August 2021 khan Operational License hmuh a ni. He khawl hi American company Varian Medical System siam niin, Radio Isotope hmanglo a Radiation dose sang tak, Electricity hmanga siamchhuak thei niin he khawl hmang hian Cancer Cells bik te chauh hemin, a bulhnaia Timur hrisel a khawih tel dawn lova. State pawn a damlo tam tak refer thin te chu he khawl hmang hian a enkawl theih tawh dawn a ni.

Linear Accelerator hi 1970 chho ah hmuhchhuah niin India rama a hmasa ber atan Cancer Institute, Chennai-ah kum 1976 khan bun a ni a. Khawvel thiamna thang chho zel leh Technology a hmasawnna nasa takin Linear Accelerator-ah pawh nghawng rawn nei chho zelin, tuna khawl thar hawn tak, TRUE BEAM hi a rawn hrinchhuah a ni a, A hma a khawl te aia hman nuam, awlsam leh changkang, damlo enkawl nana hun duh reilo thei tur leh Imaging Technology tha taka thuam a ni a, 3D thalak nan hun sen 60% zet a tlem leh X-Ray dose 25% zet a tlem zawk tur a siamchhuah a ni. Damlo te rilru la peng thei turin Built-in music system pawha thuam niin, thawm bengchheng siam lo thei tur ang ber a siam a ni bawk.

Comments

Chhiar Hlawhte