Latest News

Kawng siam nan a theih anga tam RCC hman tum

Chief Minister Zoramthanga chuan Fur ruah-tui tamna, Mizoram kawng chu hmundang aiin a chhe chak a, kawng siam nan a theih anga tam RCC hman tum zel a ni, a ti.

Nimin-a Assembly Session-ah zawhna chhangin Chief Minister chuan Mizoram hmun hrang hranga kawng chhia chu Fur ruahtui tam laiin tha taka siam turin hmalak chak a harsa tih a sawi a, Mizoram chu ruahtui in a duh avang leh kawng siamna tur hmanrua pawh ruahtui in a chiah chuan a chhe chak tih a sawi a, Bitumen kawng leh Fur ruahtui in tawng chu kawngchhiat chakna chhan a ni, a ti a, hmun tam taka leimin pawhin kawng a tichhe zual a ti bawk.

Kawng siam a chak theih loh chhanah Fur ruahtui mai bakah sanction hmuh tlai a awm thin thu pawh sawiin Chief Minister chuan, Contractor te tan bungraw lakluh a harsa thin a, hripui len lai hian thawktu inhmuh zawhloh te chu kawngsiam muan chhan a ni, a ti bawk.

Zawhna dang chhangin, House Leader leh PWD changtu ni bawk Zoramthanga chuan Kaladan Multi-Modal Transit Transport Project (KMTTP) Compensation Mizoram square kilometre aia zau anga claim chungchang ah fello lai a awm anih chuan an lo enzui tur thu a sawi a, Diltlang kawng BRTF in an enkawl kawng chu siamthat theih turin an lo enzui tur thu a sawi a, Fur lai chuan kawng chu duhthu-sam a ni theilo tih sawiin, Mizoram kawng chu hmun thenkhatah chhe mahse kawnttha hmuh tur a tam a, Hrangchalkawn – Lawngtlai lam BRTF in theihtawpa an thawhchak theih nan hma an lo lak tur thu a sawi bawk.

Chief Minister Zoramthanga chuan ramri bulah kawng siam zel a ni tih pawh sawiin, ramri bula inkalpawhna chu a pawimawh vangin theihtawpa chaka hmalak mek a ni a ti bawk.

Comments

Chhiar Hlawhte