Aibawk-a Mini Sports Complex siam mek sawifiah

ZPM Party chuan Aibawk-a Mini Sports Complex siam mek chu nimin khan tlawh lehin thil awmdan an enfiah.

Aibawk Mini Sports Complex siam mek an tlawh hnua thuchhuah an siamah ZPM Party chuan Aibawk Mini Sports Complex hi NLCPR hnuaia atanga sum lokal hmanga hnathawh tur a ruahman a ni tih sawiin, May 5, 2017 khan he Project hi pawm niin, kum 2 chhung a zawh hman tura ruahman a nih thu leh May 5, 2019 kha zawh hun tur a ni tih an sawi a, chhan hrang hrang avanga zawh hman a nih loh avangin a zawh hun April 11, 2021 kha ruat leh niin, Vawiin thlenga zawh a la ni ta chuang lo tih an sawi.

ZPM Party chuan Aibawk Mini Sports Complex hi Rural Development Department hnuaiah cheng nuai 400 senga sak tura ruahman a nih thu pawh sawiin, Restricted Tender niin, NECS in he hna hi an thawk tih an sawi a. Kum 2018 March thla khan thawh tan niin, he hna bul tanpuitu pawh khatih laia NECS hotupa, tun Ministry-a MoS ni ta Robert Romawia Royte a ni tih sawiin, “Politics-a a luh tak avangin, Works Supervisor ruat a ni leh a. He hnathawh hi a muan em avang leh khawtlang mipui manganna khawp hial a ngaihsak hlawh lo a hun rei tak a awm chu Pu C. Lalsawivunga, MLA Aizawl South-I chuan September 2, 2021 khan a hmunah a tlawh a. MLA in a tlawh lai hian Chhimphei mipuite Football khelhna ber Aibawk Field chu khaw ram hluihlawn tawh ang maiin hnim in a lo bawh khat vek a. Field kaltlanga Thlanmual panna kawng pawh hnatlang-a samfai ngai hial khawpin a awm a ni,” an ti.

September 2, 2021-a Aizawl South-I MLA in a tlawh thu hi sawrkar beng thleng nghal tih pawh ZPM chuan sawiin, “A tlawh tuk September 3, 2021-ah Field chu an samfaitir ta nghal rum rum a. Mihring tha ringawta a samfai mai chi a lo nih tawh loh avangin, September 4, 2021 khan Excavator (JCB) an ruai ta hial a, September 6, 2021-ah pawh samfai hna chu thawh chhunzawm zelin, a tuk September 7, 2021 chawhnu khan Rural Development changtu Minister Pu Lalruatkima chuan helai bialtu MLA leh Official te hruaiin a va tlawh ta a. Contractor ten theihtawp an chhuah thu leh hripui avanga central sawrkarin sum rawn pekchhuah zung zung an harsat thu leh hemi avanga project tangkhang a tam thu chu hna thawh chak lohna chhan a nih thu a sawi a. He hna hi a nih tur anga thawh leh tan nise, hripuiin min tihbuai tak tak hmaa zawh hman vek a ni a, ZPM chuan chhuanlam tlingah kan ngai lo a ni,” an ti.

ZPM Party chuan nimin-a helai hmun an tlawh pawh hian hna-thawktute lo awmin, a hmun hma te pawh theih ang anga tihfai leh siamrem hna an lo thawk tih an sawi a, he Mini Sports Complex hi a nih dan tur ang taka thaa thawk zo thuai tura an beisei thu an sawi bawk.