Latest News

Tunhnaia ramri chungchanga buaina thleng ah State pahnih aiawhte Aizawl-ah an inbia

Tunhnaia Mizoram leh Assam ramri chungchanga buaina kal zelah nimin khan State pahnih aiawhte'n Mizoram-ah inbiakna an nei a. Inbiakna neih zawh hnu hian Assam sawrkar chuan Travel Advisory a tihchhuah chu sutin, Assam lam atanga Mizoram luhkha kawngpui, NH. 306 dan mek pawh tihtawp a nih thuai beisei a ni.

July 26, 2021-a ramri hrula Mizoram leh Assam Police te inkahna thlen hnuah remna zawnga inbiakna felfai tak neih a nih loh hnuah nimin chawhma dar 11:00 khan State pahnih aiawhte chu Aizawl-a Aijal Club-ah an inbia a, he inbiakna ah hian Mizoram atanga tel te chu Home Minister, Lalchamliama chuan hovin Assam aiawhte hi Border Protection & Development Minister Atul Bora chuan a ho a. Inbiakna an neih zawh hnua chanchinbu mite'n Assam lam atanga Mizoram luhka kawngpui, NH. 306 dan mek chungchang zawhna chu Assam sawrkar aiawh Minister Atul Bora chuan, “Kawngpui dan mek chu sawrkar tih a ni lova, Vawiin-a inbiakna hlawhtling tak kan neih theih avangin boruak a that chhoh zel ka beisei,” tiin kawngpui dan mek hi tihtawp hun tur zawhna erawh a chhang thei lo thung.

Atul Bora chuan an inbiaknaah hian Assam sawrkar in Constitutional Boundary chungchang tarlangin, Mizoram-in Historical Boundary an tarlang ve thung tih sawiin, “Tun dinhmunah thil engkim fel vek lo mah se, kan hma hun lo kal zel turah a fel vek ang,” tiin, State pahnih in hun hmasaa thil thleng tawhte chu theihnghilh se a duh thu leh hun ralmuang taka Mizoram sawrkar nena inbe thei a, inrem thei chu lawmawm a tih thu a sawi bawk.

Mizoram Home Minister Lalchamliana pawhin, tawngka in State pahnih te chu District Level-ah thla tin an inbiak tur thu a sawi a, ramri a awm District Mizoram lamah Kolasib leh Mamit leh Assam lamah Cachar, Hailakandi leh Karimganj te chuan thla tin inbiakna an neih tur thu leh buaina thleng awm leh pawh nise District Level a inbiakna neih thuai thin ni se an ti tih a sawi bawk.

He inbiakna nei tur hian Assam sawrkar Palai te chu nimin chawhma lam khan Lengpui Airport-ah rawn tumin, inbiakna neih zawh hnu tlai dar 5:15 vek khan Lengpui chhuahsanin Assam an pan leh nghal a. Assam lam an pan hnu hian Assam sawrkar chuan thuchhuah siam nghalin, July 29, 2021-a Mizoram-a zin turte fimkhur tura thurawn (Travel Advisory) an lo tihchhuah tawh chu hnuhlet a nih thu an tarlang a. Hetianga Assam sawrkar in thuchhuah a siam hnu ah hi chuan NH. 306 dan mek pawh tihtawp mai a nih a rinawm tih thudawnna chuan a sawi bawk.

Comments

Chhiar Hlawhte