Chanchin thar thenkhat :

Tripura atangin Gas la

Assam atanga Mizoram chak lakna kawng danpin a nih avanga Tripura-a eirawngbawlna Gas phura kal Truck kal 4 te chuan nimin khan Aizawl rawn thlengin Supply Department Director, Ramdinliani leh Mizofed Chairman, Lal-dawngliana te chuan an lo dawngsawng a. Heng Gas phurtute hian Bishalgarh Bottling Plant, Tripura atanga Gas hi phurin LPG bur 1224 vel an rawn thlenpui a, Motor dang pakhat erawh khawl lam fellohna avangin ala rawn thleng ve thei rihlo thung a ni. Nimin a Gas rawn thleng hi MIZOFED-ah truck pahnih leh Zothan Indane Gas Agecy leh Biakkungi Gas Agency-ah trip khat ve ve insem tur a ni a. Nimin vek khan Mizo-ram Police Gas Agency, M&B Indane Gas Agency, Khatla leh Southern Gas Service, Lunglei truck te chuan Tripura hi an pan leh bawk a ni.

ASF/PRRS Test Kit hlan

Agriculture Department Secretary, J. Hming-thanmawia chuan FOCUS Project hnuaia lei tunlaia Vawk hri leng mek endikna hmanrua, ASF/PRRS Rapid Test kits chu nimin khan AH & Vety Derpartment hotute kutah a hlan a, Vawk hri leng mek avang hian Vawk tam tak a thih tawh thu leh Vawkvulhtu ten sum tam tak an hloh tawh thu sawiin, a darh zel dan chhuina leh hriat chhuah thuai theihna turin Agriculture Department hnuaia FOCUS Project chuan Test kit leh hmanraw dang engemawzat a lei thu a sawi bawk. Nimin-a AH&Vety hnena bungrua hlan te hi ASF Test Kit 2000 leh PRRS Test Kits 400 a ni a. Heng bakah hian ELISA Kit, Spectrophotometer, PPE leh Laboratory equipments leh chemical te an la pe dawn a ni.

Langkaih Lei-ah kawng dang

Damcherra Dawrkai Committee chuan zalen taka Mizoram lam a thil zawrh phal ngiatin nimin tlai dar 3:00 atang khan Tripura leh Mizoram inkalpawhna Langkaih Lei an dang a, hei vang hian Tripura atanga mamawh lakluhna ah harsatna thlengin nizan khan kawng hi hawn leh a ni.