Latest News

Tunhnaia AMC huamchhunga hri kai pun tharna Veng te Health Minister in a tlawh

Health Minister Dr. R. Lalthangliana chuan tunhnaia Aizawl khawpuia COVID-19 hri kai pun thar nasatna Veng hrang hrangte nimin khan a tlawh a, kan boruak thlirin hri leng inkaichhawnna ah a vawrtawp kan thlen mek laia inthlahdul chu a hlauhawm-a an hriat avanga Lockdown pawhsei leh a nih thu a sawi.

Health Minister hian nimin khan Mission Vengthlang, Lawipu, Maubawk, Bungkawn Vengthar, Chawnpui, Chawlhhmun, Ramhlun Vengthar, Ramhlun Sports Complex, Muanna Veng leh Thuampui te tlawhin heng Veng hrang hrang a tlawhna ah hian Local Task Force hruaitute leh khawtlang hruaitute nen inkawmhona an nei a. Veng chhungin hripui leng dona kawnga hma an lak dante inhrilhfiah niin, an harsatna tawhte leh mamawhte bakah hmalak chhunzawm zel dan turte an sawiho bawk.

Heng Veng hrang hrang a tlawhna ah hian Health Minister chuan AMC huamchhunga chawlhkar khat dang Lockdown pawhsei a nih chhan sawiin, “Kan boruak kan thlirin hri leng inkaichhawnna ah a vawrtawp kan thlen mek laia inthlahdul hi a hlauhawmin kan hre si a, hreh tak leh inthlahrung takin kar khat chhung kan boruak ngaichang leh ila kan ti a, kan pawtsei leh a ni,” a ti a. Mipuite leh khawtlang hruaitute pawhin lo hrethiam hram hram turin a ngen tih a sawi bawk.

Health Minister-in Veng hrang hrang a tlawhna ah hian hri kai tharte enkawlna tur hmun chungchang leh thil pawimawh dangte sawiho a ni a. CCCC siam thar tur Veng te nen pawh hmalak dan tur leh ruahmanna an siam dan te sawiho niin, Home Isolation a awmte chungchangah chhungkaw dinhmunin a zir a nih chuan Home Isolation a in dah a uluk taka in vil zui a pawimawh tih sawi a ni a. CCCC-a awmte awmze nei leh felfai zawka enkawl leh vil dan turte sawiho niin, CCCC atana mamawh sawrkarin a lo pek leh hawh tir theih turte an sawiho bawk a, Health Minister chuan an tih ve theihna chin ang angah theihtawp an lo chhuah zel tur thu a sawi a ni.

Nimin a heng Veng a tlawhna ah hian Health Minister hi Health Department hotu lian ten an tawiawm a ni.

Comments

Popular News (Last 30 Days)