Latest News

Cricket Final khel dawn

Cricket Association of Serchhip District in an buatsaih, Serchhip District Cricket League vawi khatna chu Vawiin chhun dar 12:00 hian Final khelh a ni dawn ta a, Tuikhuah Veng CC leh AO3C ten Final hi an khel dawn a ni. He inkhel hi TV lamah en theih tura pekchhuah leh a ni dawn a ni. Vawiin a Final khelh hi Cricket Association of Mizoram hotute pawhin an rawn hmanpui dawn a ni.

Tlawmngai pawl hruaitu ten kawngpui dan vangin mipuite chi-ai lo leh zam lo turin an chah

Mizoram a tlawmngai pawl intelkhawmna, Joint NGO Coordination Committee hruaitute chuan ramri hrul buaina thleng vanga Assam lamin kawngpui an dan chah (economic blockade) mek chu chi-ai lo leh zam lo a hmachhawn turin Mizo mipuite an chah.

Joint NGO Coordination Committee Chairman, Central YMA President ni bawk Vanlalruata chuan Assam lamin Mizoram mamawh chawkluhna kawngpui an dan chah mek chungchangah mipuite kan inlungrual a, kan chhel deuh a ngai dawn tih sawiin, sumdawng leh dawrkaite pawh an thil zawrh ti to lo tur leh chheprelh lo turin a chah a, kawngpui an dan in engti rei ngei a awh dawn hriat a nih loh avangin, tun hi ‘Sem sem dam dam’ tih hman hun tak a nih thu a sawi bawk.

Mizoram Upa Pawl (MUP) General Hqrs. President Lalhuapzauva pawhin, Assam lam kawngpui dan chah vanga zam lo turin mipuite chahin, kan tharchhuah ah kan inhnangfakna tur a awm thu a sawi a. “Economic blockade hi keini chauhin kan tuar lo a, anmahni pawh an in block,” tiin “Zam mai lo in, tuar hram hram ang u,” a ti bawk. MHIP General Hqrs. President T. Lalthangpuii pawhin, mipuiten chi-ai lo in, sawrkar hmalakna kan rin ngam a ngai tih a sawi a, inrenchem taka khawsak kan thiam rih a ngaih thu leh ram leh hnam thil a nih vangin party sawi lo a, inlungrual taka sawrkar hmalakna tawiawm a tul thu a sawi bawk.

Assam lam in kan eibar lak luhna kawngpui min dan chah sak leh chu tha nat thlak a tih thu sawiin MZP President B. Vanlaltana chuan, kan mamawhna leh min mamawhna a danglam bik lo tih hre turin Mizo mipuite a chah a. “Kan hnenah lo bungraw hralhna an nei bik lo tih hriain, engkimah duham fal bik nih tum lo ila, a thlum a al ei za thin Hnam ze ropui neitu kan nihna parvul thar tir leh ila, riltam a min dan beh tumtute mangang hmel hmu ngei turin i tang tlang ang u,” a ti a. Mizo Students Union (MSU) President J. Lalmuanzuala pawhin, mipuite chi-ai lo tura chahin, Assam lam chauh mamawh lakluhna kawngpui a awm loh thu leh Tripura atangin mamawh chawkluh mek a nih tawh thu a sawi a. Dinhmun harsa zawkte hrethiam chung leh tawrh a tul pawh a tuar tlang a, a awm awm ei za tura sem sem dam dam tih rilru putlang turin mipuite a chah bawk.

Comments

Chhiar Hlawhte