Latest News

South Vanlaiphai khua ah PHC Building hawng

Health Minister Dr.R.Lalthangliana chuan cheng nuai 140 senga South Vanlaiphai PHC building sak thar chu luah theih turin a hawng.

NABARD sum atanga PHC Building sak thar hawnna hunah hian Health Minister chuan Health Department hian a tum ber chu mi nunna chhan theih nana hmalak a ni tih sawiin, “Mite hrisel tir hi a tum ber chu a ni a, Hospital Building tha tak neih aiin a chhunga tha taka service hi a pawimawh zawk a ni,” a ti. Health Minister chuan Covid First Wave-ah khan Mizoram-ah mi 10 vel awrhin nunna kan chan tih sawiin, “Second Wave-ah chuan mi 170 chuangin nunna hlu tak kan chan ta a, a pawi kan ti takzet a. Mithiam ten Third Wave lo thleng turah chuan kum lama naupang zawk ten an tuar nasa dawn nia an sawi avangin kawng hrang hrangin kan inbuatsaih lawk a ni,” a ti a. “Tuna Mizoram-a Covid thihpuite hi Comorbid, natna benvawn nei, Cancer, Zunthlum, Lung thalo, Thisen Sang leh natna dang lo nei sa te an ni tlangpui a. Covid an kai tawh chuan an natna dang kha kan sawi ri tawh ngai lo a, Covid thihpui an ni vek tawh mai a ni,” a ti bawk. 

Commerce & Industry Department changtu Minister ni bawk Dr. R. Lalthangliana chuan, “Silchar kawng buai hleka Assam hovin an nawm an maka kan ei leh in, kan bungraw chawkluhna kawngpui ber min dan chahsak fo hi tha lo kan ti hle a. Silchar kawng chauh hmang reng lo turin Bangladesh lam nen pawh kan indawr zel a, Zorinpui, Saisihchhuah, Kawrpuichhuah leh Silsuri lamah International Border Trade tipuitling turin theihtawp kan chhuah zel dawn a, Bangladesh Commerce Minister nen pawh kan inbe reng a, remchang hmasa berah a hmunhma enfiah dun kan tum a ni,” a ti bawk.

Comments

Chhiar Hlawhte