Serchhip Agriculture Complex-ah building sak thar pathum leh Video Conference Hall thar te hawn a ni

Serchhip Agriculture Complex-a Building sak thar pathum (3) leh Video Conference Hall siam thar te chu nimin khan Agriculture Department-a Director, Rohmingthanga Colney chuan a hawng a. FOCUS Serchhip District Annual Report leh an hlawhtlinna tarlanna a Bu-a siam te pawh a tlangzarh nghal bawk.

Nimin-a Serchhip Agriculture Complex-a hawn tak te hi Specialised Storage Facility cum Feed Mill Building te, Collection, Aggregation & Grading (CAG) Unit Building te, Machinery House cum FOCUS District Project Manager Office leh DAO Office Building-a Committee Room cum Video Conference Hall siam thar te a ni a. Heng Building hawnna puala inkhawm DAO Committee Room cum Video Conference Hall thar-a neih ah Agriculture Department Director, Rohmingthanga Colney chuan Serchhip District-ah hmasawnna tur pawimawh tak tak a ruala pali (4) lai a hawng thei chu lawmawm a tih thu sawiin, heng building te hi sak an nihna chhan ang ngeia tangkai taka hmang zui turin thawktute leh loneitute chu a chah a. Serchhip District chu tunhma atanga Vawiin thlengin Agriculture Department hmalakna kawng tinrenga an chhuanvawr a nih thu leh fak tlaka hna thawk thin an nih thu sawiin, midangte tana entawn tlak tura hna thawk zel turin a chah bawk.

Agriculture Department Director chuan an Department hnuaiah peng hrang hrang a awm thu pawh sawiin, heng peng hrang hrangte hian thawhhona tha tak an neih a pawimawh thu leh an thiamna te an chhawr tawn a pawimawh thu a sawi a. Farmers te tana thawk an ni tih in hre tura chahin, kuthnathawktute tana enchhinna an neih hrang hrangte pawh a enchhintute lungawina ringawt ni lovin, midang ten tangkai takin an hmang em tih an ngaihtuah tel a tul thu a sawi a. Sik leh sa danglam avanga harsatna thlengah kan thlai chin thin leh kan chin dan kalphung te pawh herrem ve zel a tul dawn thu sawiin, COVID-19 hri leng chuan loneitute tharchhuah ah nghawng a nei ngei dawn nia a lan thu a sawi a. Loneitute chu harsatna an neih te an hnena thlen tura chahin, hmalak zel a nih tur thu leh a tul angin thuneitu sang-ah pawh thlen zel a nih tur thu a sawi bawk.

Serchhip DAO Tlangtimawia Zote kaih-hruai he hunah hian K. Laltlanmawia, BAO, Serchhip chuan Technical Report pe in Building thar hawn tak pathum chu RKVY-RAFTAAR sum hmanga sak a ni tih a sawi a. Specialised Storage Facility cum Feed Mill Building hi cheng nuai 16 senga sak niin Oct. 7, 2021 khan sak tan niin April 10, 2021-ah sak zawh a ni a. Feed Mill khawl tak hi Punjab atanga rawn thawn niin kawnglak-ah a thang mek a, khawl hi bunfel a nih hunah chuan Vaimim leh Bekang an chin tir atanga tharchhuah te chu lei khawmin helai hmun atang hian Ran chaw siamin man tlawm zawka hralh-chhuah a ni ang.

Collection, Aggregation & Grading (CAG) Unit Building hi cheng nuai 11.25 senga sak niin Sept. 12, 2020-ah sa tanin April 24, 2021-ah sak zawh a ni a. Machinery House cum FOCUS District Project Manager Office hi cheng nuai 17.32 senga sak niin Sept. 15, 2020-ah sa tanin April 30, 2021-ah sak zawh a ni a, he Building hi FOCUS hnuaia thawk ten Pisa-a an hman nghal tur niin Video Conference Hall hi DAO Office in sum rem-chang hmanga an siam a ni thung.

Nimin a he hun hmanna ah hian RK. Nithanga, Jt. Director (Agri), SPD FOCUS pawhin thu a sawi bakah ATMA Serchhip District hmalak te Lalchhuansangi, Project Director, ATMA chuan a tarlang a. DMU-FO-CUS hmalakna te Dominic Lalremsiama, AM (P) in pein, KVK N. Vanlaiphai hnathawh dan Dr. T. Vanlalngurzauva, Sr. Scientist & Head leh Serchhip DAO Office hnathawh dan R. Lalrinawma, ADAO te chuan a lem nen entirin an sawifiah bawk a, sawm bik mi tlemte in he hun hi an hmanpui a ni.