Remchang hmasa a Dental Doctor la turin inbuatsaih mek a ni - Health Minister

Health Minister Dr. R. Lalthangliana chuan Mizoram-ah Dental Doctor chu kum 20 chhung an lo la tawh lo tih sawiin, remchang hmasa berah la tura inbuatsaih mek a nih thu a sawi.

Health Minister hian nimin khan Mizoram-a Damdawi In hmasa ber, kum 1913-a din North Vanlaiphai PHC chu tlawhin Hospital thawktute leh khawtlang hruaituten an lo dawngsawng a. Khawtlang hruaitute leh an Party hruaitute leh Official ten lo dawngsawngin North Vanlaiphai PHC mamawh hrang hrang an lo thlen a, PHC-a damlo awm te Rs. 1000/- theuha kanin PHC-a Volunteer thawk mek te pawh Rs. 1000/- theuh a pe bawk. Hemi hnu hian Cherhlun pan lehin RD Rest House-ah Cherhlun khuaa sawrkar Official leh khawtlang hruaitute nen thutkhawm an nei leh bawk a, heng hunah hian Health Minister chuan Mizoram-ah kum 20 chung Dental Doctor lak a ni tawhlo tih sawiin, remchang hmasa berah la turin an in ruahman tih a sawi a. “World Bank Project cheng vbc. 220 pawh kan hlawhtlinpui tan ta a, Hospital leh Sub-Centre hrang hrangte tihchangtlunna tura hman a ni ang. Health Department-a hna ruak hrang hrang Post 740 lak mai tura kan tihte pawh Covid vangin kan la thei mai lova, boruakte a ziaawm dan azira la hnawhkhah kan tum dawn a ni,” a ti.

India ram hmun thenkhatah Covid a kiam rualin Mizoram-ah kan la ziaawm hlei thei lo tih pawh Health Minister chuan sawiin, fimkhur taka tha thlah lova kan beih chhunzawm a la ngai tih a sawi a. “Covid-in nasa takin khawvel min nuai a, Medical lama thiam ram changkangte pawh an mualpho a ni. Keini pawhin SEDP atan sum ruahmanna kan kalpui dawn chauh a, Department zawng zawng a nghawng a, Covid chu awm lo se SEDP pawh kan kalpuina a rei tawh ang,” a ti a. Covid avang hian sawrkar hna leh Contract-te pawh an inpek theihloh phah tih pawh sawiin, kan boruak rip zualpui hi a la ziaawm ve mai turah beisei turin a chah bawk. Health Minister chuan Covid vaccine a pawimawh thu pawh sawiin, Vaccine la la lo zawng zawngte chu la vek turin a ngen bawk a. “Vaccine lak ah India ramah a titha ber 7-na kan ni a, hmarchhak-ah pawh a titha pahnihna kan ni. Thawktu zawng zawng leh Task Force zawng zawng chungah lawmthu ka sawi nawn leh a, Pathian rinchhanin theihtawp i chhuah bang lovang u,” a ti bawk.

South Tuipui bialtu ni bawk Health Minister hian nimin tlai lam khan a bial chhunga Thingsai, Khawhri leh Tarpho khua te tlawh lehin sawrkar official leh khawtlang hruaitute nen inkawmna an nei leh bawk a, nizan khan Hnahthial-ah riakin Vawiin lam hian a bial chhung khaw dang fang lehin naktuk-a India Independence Day lawmna Hnahthial-a neih tur chu Khuallian niin a hmanpui nghal dawn a ni.