Latest News

NEC sum hmanga KDZKT Road siamthat Chief Minister in Tuidam khua ah a hawng

Chief Minister Zoramthanga chuan nimin khan North Eastern Council (NEC) atanga sum hmuh hmanga siam KM 84.50-a thui Khedacherra-Damcherra-Zamuang-Kawrthah-Tuilutkawn (KDZKT) Road chu Tuidam-ah a hawng a, he kawng hi Single Lane atanga Intermediate Lane ah siam niin PWD in an thawk a ni.

Tripura leh Assam atanga Mizoram chak lakluhna kawng hawnna puala inkhawm neih ah Chief Minister chuan ei leh bara hmasawnna atan kawng tha leh inkalpawhna tha neih a pawimawh thu sawiin, KDZKT kawngpui chu Zoram pum tan leh a bik takin khawtlang tan tangkai tak a nih thu a sawi a; hmabak la awm pawh zawh thuai a beisei thu a sawi bawk. Chief Minister chuan eitur-a intodelh chu sawrkarin ngaipawimawhin, thawhhona tha tak nen ram intodelh leh entawntlak ah kan ram hi kan siam theih thu a sawi a. Mizoram pumpui tan chaw a intodelh tur chuan thingtlang Lo neih a kumtin ram vah kual nilovin, Leilet a siam theih lai lai leilet-ah siama khawl hmanga enkawlin, tha sen ngai tam silovin Buh kan mamawh chu kan tharchhuah mai tur thu a sawi a. Tunhnaia kan boruak tawn atangin thlai leh thei lamah kan intodelh thei tih a lan thu te, sa leh thildang remchang apiangah intodelh a tum thu a sawi a. Sum chang thlai te hi a nih ang anga thawnchhuak mai lovin, hlawkna tam zawk kan hailuh theih nan mahni ramchhungah ngei man man zawka siam turin Processing Plant te dahin, kawng hrang hranga hmalak theihna a awm thu a sawi bawk.

Nimin-a kawng hawn tak atan hian North Eastern Council (NEC) chuan January 9, 2013 khan cheng vbc. 134.70 (estimate amount) sanction in State in a tum ve tur 10% a ni a. M/S DRAIPL & ABCI Ltd (JV), Guwahati chu May 25, 2015 khan cheng vbc. 179.63 hmanga he kawng siam hna hi thawk tura thlan an ni a. Sanction leh Work Order pek karah Rate thar a chhuah avangin thawk tura intiamna zat hi sang ta a ni.

Hei bakah hian July 1, 2017 atanga GST hman tan a nih avangin kawng siamna tur sum hi ennawn leh a ngaih phah a, cheng vbc. 183.27 a siam danglam lehna chu phalna ngaihchan mek a ni. He kawng hi KM 89.50 tur niin, Tiger Reserve Area paltlang tlem a awm a. Helai chhunga hnathawk tur hian phalna hmuh theih a nih lawk loh avangin hna a khawmuan phah bawk a, tuna la bang KM 5 chu Single Lane-a chhunzawm tur niin thawh zawh thuai beisei a ni.

Kawng hawnna hun hi Addl. Chief Secretary JC. Ramthanga chuan kaihruaiin Road and Infrastructure Development Board Vice Chairman Er. H. Lalzirlianam pawhin a hmanpui a ni.

Comments

Chhiar Hlawhte