Latest News

Tuirial bialtu MLA Andrew H. Thangliana nimin khan boralin vuiliam nghal a ni

Tuirial bialtu MLA Andrew H. Thangliana chu nimin zing khan boralin nimin vek khan vuiliam nghal a ni.

Kum 44-a upa Andrew H. Thangliana hian tunhnai chho ah taksa lama insawiselna a neih avangin Doctor te a rawn hnuah July 21, 2021 khan Civil Hospital, Aizawl-ah admit a ni a, a Thin-ah chawr a awm nia hriat niin enkawl zui tura tih ni mah se a hriselna in hniam lam a pan zel avangin biopsy pawh lak ngamloh in a awm zui a, August 5, 2021 khan Ebenezer Medical Center-ah dahluh niin High Dependency Unit (HDU)-ah dah nghal a ni a, Pneumonia a nasat avangin August 12, 2021 zan khan a thawk buaiin a tuk-ah ICU-ah dahluh nghal a ni a, hemi hnu hian hniam lam pan zelin Ventilator te hman a nih hnuah nimin zing dar 6:35 khan a boral zui a, a ruang hi an chenna In-ah lak niin nimin vek khan vuiliam nghal a ni.

Andrew H. Thangliana hi Samuel H. Thangliana leh C. Lalhmingliani te fa niin October 4, 1977-ah a piang a, H. Lalromawii d/o HL. Muanthanga, Serchhip nen inneiin fa 3 a nei a, Aizawl Chawlhhmun-ah an khawsa a ni. Kum 2017 khan ZNP-ah lutin ZPM-a an inchhunluh khan awm zuiin kum 2018 MLA inthlanpui-ah khan kum 41 mi niin a tum khatna atan Tuirial A/C atangin MLA atana thlantlin a ni a, a boral thlengin MLA hi a ni zui a, nimin-a amah vuina hunah hian Assembly House Leader Zoramthanga leh Assembly Speaker Lalrinliana Sailo bakah Minister leh MLA thahnem tak an tel a, a bial chhung khaw hrang hrangah amah sunna hun hman a ni bawk.

ZPM Party chuan nimin khan thuchhuah siamin Andrew H. Thangliana boral chu pawi an tih thu leh an sun thu an tarlang a, ZPM Party tan chuan channa nasa tak a nih thu sawiin, “Thalai viak tha leh taima, Mizoram leh a bial hmasawnna tura theihtawp chhuahtu, rethei leh tanpui ngaite tana inpe zo em em Pu Andrew H. Thangliana thihna hi Tuirial bial mai ni lo, Mizoram tan channa nasa tak a ni,” an ti. BJP Mizoram Pradesh pawhin hetiang mi taima leh inpe, mahni bial leh Mizoram hmangaihtu kan chan ta mai chu pawi an ti takzet tih thuchhuah siama tarlangin, a kalsan tak a nupui fanau leh chhungkhat te thinlung takin an tawrhpui thu an sawi a. PC Party pawhin Ram leh hnam tana a sur a sa hnuaia thawk rim thin, a bial mipui leh mi rethei leh chanhaite hmangaih leh duhsak taka dawm thin tu thihna chu Tuirial bial mipui leh kan ram leh hnam tan channa nasa takah an ngai tih an sawi. MNF Party pawhin Andrew H. Thangliana boral chu hun lo an tih thu leh pawi an ti takzet tih an sawi a, a kalsan tak a nupui fanau leh chhung khatte chu Pathian thlamuanna leh awmpuina chang zel turin duhsakna an hlan bawk.

Comments

Popular News (Last 30 Days)