Latest News

Inkaihhruaina hman zui tur

Serchhip District Bawrhsap Kumar Abhishek chuan nimin khan thupek tichhuakin COVID-19 hri leng hluar zel laka mipuite him theihna tura tun thla ni 2-a inkaihhruaina thupek lo tihchhuah tawh chu Oct. 17, 2021 atanga Oct. 30, 2021 zanlai dar 12:00 thleng Serchhip District-ah hman chhunzawm tur a nih thu a tarlang.

Quick Response Team ten training nei tan

Serchhip District-a chhiatna thlen thulha rang taka tanpuina hna thawktu tur, Quick Response Team mi 9 te tana ni 4 chhung awh tur Training chu nimin khan Serchhip-ah neih tan a ni.

Serchhip DC Meeting Hall-a he training hawnna hun hi District Bawrhsap Kumar Abhishek IAS chuan khuallian nia hmanpuiin training hi a hawng a, Bawrhsap chuan Mizoram hi tlangram niin chhiatna chi hrang hrang thleng thei lakah a him tawk lo hle tih sawiin, Chhiatna thlen palh thuta tanpuina hna thawktu tur QRT neih chu thil tul tak, neih ngei ngei tur a ni tih a sawi a. Chutiang hna thawktu turte tana training buatsaih a ni chu lawmawm a tih thu sawiin, training hlawk leh tangkai tak ni turin duhsakna a hlan bawk.

Quick Response Team-ah hian mi 9 awmin mipa 7 leh hmeichhia pahnih an ni a, an vai hian Serchhip khua vek niin Sports & Youth Services Department-a Instructor, Moses Lalthanpuia chuan an training chhung hian chhiatna thlen palha chhanchhuahna hna thawh dan chi hrang hrang leh hmanraw hrang hrang hman dante a zirtir ang. An ni hi Serchhip District chhunga chhiatna lo thlen palha chhanchhuahna hna thawk tura mamawh an nih chuan DC Office atangin tirhchhuah thin an ni dawn a ni.

Nimin-a Training hawnna hun hi Addl. DC Lalmuansanga Ralte chuan kaihruaiin Serchhip DC Office-a Officer te leh DM&R-a District Organiser Valalduhi Ralte te chuan  an hmanpui a ni.

Comments

Chhiar Hlawhte