Latest News

Hri kai la hmuh belh zel

Mizoram-ah COVID-19 hri kai hmuh-chhuah an la awm belh zel a, niminpiah a Sample enfiah 7733 atangin hri kai mi 937 hmuh an ni a, Sample enfiah zawng zawng atanga zaa 12.11 te chuan hri an kai a ni.

ZMC-a RT-PCR Laboratory-ah niminpiah khan District pathum atanga Sample lak 2916 enfiah niin hri kai mi 167 hmuh an ni a, an vai hian Aizawl District-a Sample lak vek an ni a, hri kai hmuhchhuah tamna ber Bawngkawn-ah hri kai mi 22 hmuh niin Lawipu-ah 15 hmuh an ni a, Ramthar North-ah hri kai mi 10 hmuh an ni bawk.

District hrang hranga TrueNat Laboratory 10-ah Sample 298 enfiah leh bawk niin hri kai mi 72 hmuh niin an zinga mi 34 te chu Cham-phai District ami an ni a, Lawngtlai District-ah hri kai mi 18 hmuh niin Lunglei District-ah 8, Mamit District-ah 7, Aizawl District-ah 3, leh Kolasib District-ah hri kai mi pakhat hmuh an ni.

Niminpiah khan Rapid Antigen Test hmangin Sample 4519 enfiah ni bawkin hri kai mi 699 hmuh an ni a, an zinga mi 430 te chu Aizawl District-a hri kai hmuh te an ni a, Bawngkawn, Bethlehem Vengthlang leh Chanmari-ah hri kai mi 19 theuh hmuh an ni a, Bungkawn Vengthar-ah 16, Tuirial-ah 15, Chhuanthar Tlang-nuam-ah 14 leh Zuangtui-ah 13 hmuh an ni bawk.

Heng bakah hian Kolasib District-ah hri kai mi 101 hmuh belh ni bawkin Lawngtlai District-ah mi 56, Lunglei District-ah mi 46, Mamit District-ah mi 44, Siaha District-ah mi 14, Serchhip District-ah mi 4 leh Champhai leh Hnahthial District-ah mi 2 ve ve hmuh an ni.

Nimin khan Mizoram-ah hri kai mi 868 te enkawl dam niin heti hian nimin tlai dar 5:00 thleng khan Mizoram-a hri kai hmuhchhuah chu 45,457 niin an zinga 33,722 (74.18%) te enkawl dam an ni tawh a, tunah hian hri kai enkawllai 11,564 awmin mi 171 an boral tawh bawk a ni.

Comments

Chhiar Hlawhte